Të paktën 30 persona humbën jetën të mërkurën në një rrëmujë masive gjatë festivalit hindu Maha Kumbh Mela në Indi, një nga tubimet fetare më të mëdha në botë.
Vaibhav Krishna, një zyrtar i lartë i policisë, u tha gazetarëve se në incident u plagosën edhe 90 persona të tjerë.
Ai shtoi se deri tani janë identifikuar 25 viktima dhe se situata është nën kontroll.
“Rrëmuja ndodhi kur pelegrinët nxituan drejt bashkimit të lumenjve të shenjtë për të gjetur hapësirë për larjen rituale, duke u përpjekur të kalonin barrikadat”, deklaroi kryeministri i Uttar Pradeshit, Yogi Adityanath.
Festivali ka nisur më herët këtë muaj në shtetin verior të Uttar Pradeshit. Gjatë gjashtë javëve të festivalit pritet të marrin pjesë rreth 400 milionë njerëz.
E mërkura shënon Mauni Amavasya, një nga ditët më të rëndësishme të festivalit. Autoritetet lokale kishin parashikuar rreth 100 milionë pjesëmarrës.
Festivali mbahet çdo 12 vjet në brigjet e lumit Prayagraj dhe këtë vit zhvillohet nga 13 janari deri më 26 shkurt.
Prayagraj, i njohur më parë si Allahabad, konsiderohet veçanërisht i shenjtë për hinduistët, pasi është shtëpia e Triveni Sangamit, pikës së bashkimit të lumenjve të shenjtë Ganges, Yamuna dhe lumit mitik Saraswati.
Kryeministri indian Narendra Modi e quajti incidentin “jashtëzakonisht të trishtueshëm”.
Ai tha se autoritetet lokale “po angazhohen për t’i ndihmuar viktimat në çdo mënyrë të mundshme”.
