Tërmet i fuqishëm në Marok, të paktën 632 të vdekur

Të paktën 632 persona humbën jetën dhe 392 u plagosën në tërmetin e fuqishëm që goditi Marokun, njoftoi sot Ministria e Brendshme e vendit.

Viktima nga tërmeti me magnitudë 7 ballë u raportuan në rajone të ndryshme, përfshirë provincat Al Hauz dhe Marakesh si dhe qytetet Ouarzazate, Azilal, Chichaoua dhe Taroudant.

Ky është tërmeti më i fuqishëm që ka goditur këtë vend të Afrikës Veriore në 100 vitet e fundit, njoftoi Instituti Kombëtar i Gjeofizikës i Marokut.

Shërbimi Gjeologjik i ShBA-së (USGS) njoftoi se epiqendra e tërmetit, i cili ndodhi mbrëmë pak pas orës 23:00 me orën lokale, ishte 75 kilometra në juglindje të Marakeshit, në një thellësi prej 18,5 kilometrash.

Situata është veçanërisht e rëndë në rajonin e Marakeshit, ku shumë ndërtesa janë shembur dhe shumë banorë kanë mbetur nën rrënoja. Mediat lokale raportuan se ndërtesa të shumta u dëmtuan, përfshirë muret e kuqe që rrethojnë pjesën e vjetër të qytetit, të cilat janë nën mbrojtjen e UNESCO-s.

Forcat e armatosura u bënë thirrje qytetarëve të tregohen të kujdesshëm dhe i drejtuan në zona të sigurta për t'i mbrojtur nga pasgoditjet e mundshme. Tërmeti është ndier edhe në Algjerinë dhe Mauritaninë fqinje. Ekipet e shpëtimit po kërkojnë nën rrënoja për të mbijetuar.

Ministria e Brendshme njoftoi se institucionet vendase, forcat policore dhe ekipet e Mbrojtjes Civile mobilizuan të gjitha burimet në dispozicion për të ofruar ndihmën e nevojshme për popullatën e prekur.

Shumë ekipe patën vështirësi për të arritur në vendin e tërmetit për shkak dëmeve në rrugë të mbetura pas tërmetit.

Televizioni maroken "Channel 1" njoftoi se tërmeti shkaktoi dëme në shumë qytete. Portali "El-Yevm 24" ka njoftuar se nga tërmeti janë shembur disa ndërtesa në qytetin e Marakeshit.

Në rrjetet sociale njerëzit po postojnë foto të bashkëqytetarëve që dalin në rrugë pas tërmetit si dhe momente të shembjes së ndërtesave.