Presidenti i zgjedhur i ShBA-së, Donald Trump, tha se po punohet për të organizuar një takim me presidentin rus Vlladimir Putin.
"Ai (Putini) dëshiron të takohet dhe ne po e organizojmë", u tha Trump gazetarëve përpara një takimi me guvernatorët republikanë në pronën e tij Mar-a-Lago në Palm Beach, Florida.
Ai nuk dha detaje të tjera për takimin e mundshëm.
"Presidenti Putin dëshiron të takohet. Ai e ka thënë këtë edhe publikisht dhe ne duhet ta mbyllim atë luftë. Kjo është një rrëmujë e përgjakshme", tha Trump, duke iu referuar luftës Rusi-Ukrainë.
Duke folur për presidentin kinez Xi Jinping, Trump tha se kanë pasur "shumë" komunikim.
"Ne kemi shumë takime të organizuara me shumë njerëz. Disa kanë ardhur, por unë do të prisja më mirë deri në datën 20", tha ai, duke iu referuar 20 janarit, datës së inaugurimit të tij.
