Ukraina njoftoi të hënën se rrëzoi 67 dronë rusë në 11 rajone, duke përfshirë kryeqytetin e Kievit.
Në një deklaratë të Forcave Ajrore të Ukrainës thuhet se Rusia ka lëshuar gjithsej 73 dronë gjatë natës, si dhe tri lloje të ndryshme raketash, përfshirë raketën balistike Iskander.
Në njoftim thuhet se 67 dronë dhe raketa lundrimi u rrëzuan mbi rajonet e Kievit, Cherkasy, Vinnytsia, Kirovograd, Zhytomyr, Poltava, Chernihiv, Sumy, Kharkiv, Dnipropetrovsk dhe Mykolaiv. Serhiy Popko, kreu i Administratës Ushtarake të qytetit të Kievit, njoftoi në Telegram se alarmi për një sulm ajror në kryeqytet zgjati më shumë se pesë orë dhe se të gjithë dronët mbi qytet u rrëzuan.
Kryetari i bashkisë së Kievit, Vitaly Klitschko, tha se rrënojat e një droni të rrëzuar rus u gjetën pranë një ndërtese banimi në lagjen Obolonsky. Guvernatori i Kievit, Ruslan Kravchenko, tha se mbetjet e dronëve të rrëzuar ranë në gjashtë rrethe të ndryshme në rajon dhe një zjarr shpërtheu në një shtëpi.
“Ndërkohë, një zjarr shpërtheu gjithashtu në një objekt kyç të infrastrukturës në distriktin Bashtanskyi të rajonit të Mykolaiv”, tha guvernatori Vitaly Kim në Telegram.
Autoritetet ruse nuk i kanë komentuar këto pretendime.
