Presidenti i Serbisë Aleksandar Vuçiq sot ka folur në margjina të Forumit të Paqes në Paris edhe për procesin e dialogut me Kosovën, me ndërmjetësimin e Bashkimit Evropian.
Vuçiq ka shprehur bindjen se derisa Albin Kurti të jetë kryeministër i Kosovës nuk pret të ketë ndonjë progres në procesin e dialogut, sidomos rreth themelimit të Asociacionit të Komunave me Shumicë Serbe në Kosovë.
“Është mirë që ne të dimë se ku jemi, të dimë se me kë kemi të bëjmë, dhe nuk ka asnjë filozofi të madhe, por mendoj se tani është e qartë për ata në perëndim që Kurti nuk dëshiron që ta formojë asociacionin e komunave serbe, se ai nuk dëshiron përparim në dialog dhe se gjithçka tjetër ishin truqe ballkanike që mund të funksionojnë një ose dy herë, por sigurisht jo në planin afatgjatë. Pra, do të jetë e rëndësishme për ne që të ruajmë jetën e serbëve në Kosovë për të ruajtur paqen, por nuk besoj se ndonjë përparim serioz, veçanërisht jo formimi i asociacionit të komunave serbe, do të vijë ndonjëherë derisa Albin Kurti të jetë në pushtet në Prishtinë”, ka thënë Vuçiq.
Ndryshe, kryeministri i Kosovës Albin Kurti ka thënë se ka dërguar vërejtje për draftin e asociacionit të prezantuar nga ndërkombëtarët, më 21 tetor. Shefi i Qeverisë së Kosovës, gjatë një vizite para disa ditësh në rajonin e Dukagjinit, tha se drafti i modernizuar për asociacionin, është më i avancuar se marrëveshja e vitit 2013.
