Presidenti i Ukrainës, Volodymyr Zelenskyy, deklaroi të enjten se është i gatshëm të takohet me presidentin rus, Vladimir Putin, për të diskutuar rrugët politike dhe diplomatike për të ndaluar luftën në Ukrainë.
Gjatë një konference për shtyp në Kiev, pas takimit me Odile Renaud-Basso, presidente e Bankës Evropiane për Rindërtim dhe Zhvillim (EBRD), Zelenskyy akuzoi Putinin se "ka frikë të flasë" me të për përfundimin e luftës.
"Presidenti i SHBA-ve, Donald Trump, dhe vendet e BE-së besojnë se diplomacia është e pamundur pa Rusinë, pa Putinin. Prandaj, unë kam thënë se jam i gatshëm (të takohem me të), nëse mund të biem dakord për mënyrën se si kjo luftë do të përfundojë për ne. Jemi të gatshëm për diplomaci, nuk kam asnjë problem me këtë. Problemi është se më duket se Putin ka frikë të bisedojë me mua për të ndaluar luftën," deklaroi ai.
Sa i përket dekretit ukrainas të nënshkruar nga vetë Zelenskyy në vitin 2022, i cili ndalon bisedimet e paqes me Rusinë për sa kohë Putin mbetet president, ai pretendoi se ky dekret nuk zbatohet ndaj tij.
Duke komentuar raportimet e mediave për një plan amerikan për të përfunduar luftën në Ukrainë, Zelenskyy tha: "Jam i sigurt se ekipet tona (SHBA-Ukrainë) do të punojnë së bashku. Nuk mund të ketë një plan tjetër."
Ai gjithashtu theksoi se Kievi po synon kontakte zyrtare me Uashingtonin, duke përfshirë edhe çështjet e planit të paqes.
Gjatë takimit me Renaud-Basso, Zelenskyy tha se diskutuan mbi ndihmën financiare të BE-së për Ukrainën.
