Zgjedhjet e 12-ta parlamentare nesër mbahen në Mal të Zi

Në prag të zgjedhjeve parlamentare që mbahen nesër (11 qershor), në Mal të Zi është duke mbizotëruar heshtja zgjedhore.

Zgjedhjet e nesërme parlamentare do të jenë të dymbëdhjetat që nga futja e sistemit shumëpartiak në Mal të Zi dhe të gjashtat pas rivendosjes së pavarësisë.

Në zgjedhjet parlamentare do të marrin pjesë 15 lista.

Nga 81 vende deputetësh aq sa numëron Kuvendi i Malit të Zi, fatin e tyre në zgjedhje do ta provojnë edhe dy lista me nga 60, gjegjësisht 67 emra shqiptarësh.

Pra, bëhet fjalë për koalicionin Aleanca Shqiptare e përbërë nga partia Forca, Lidhja Demokratike dhe Lista për Tuz, ndërsa në bllokun tjetër garojnë Forumi Shqiptar me moton “BESA për zhvillim evropian”.

Në mesin e listave për deputetë ka edhe koalicione të etniteteve të tjera, si boshnjakët, kroatët, dhe lista të tjera të pavarura.

Të drejtë vote në këto zgjedhje parlamentare kanë 542.468 qytetarë.

Qendrat e votimit do të jenë të hapura nga ora 07:00 deri në 20:00.