Gjermania bëri thirrje të martën për t'u dhënë fund aktiviteteve të grupit terrorist PKK në Siri, duke theksuar se territori sirian nuk duhet të përbëjë kërcënime sigurie për Türkiyen.
Koordinatori gjerman për Sirinë, Tobias Lindner, tha për mediat lokale se Berlini i kupton interesat legjitime të sigurisë së Türkiyes dhe shpreson që shqetësimet e Ankarasë duhet të adresohen përmes dialogut politik.
“Dua ta bëj shumë të qartë: PKK-ja është një organizatë terroriste, gjithashtu nga këndvështrimi i Gjermanisë, dhe militantët e PKK-së në veri të Sirisë duhet të kuptojnë se ne jemi tani në një situatë të ndryshme nga ajo para rënies së Bashar al-Assad,” tha Lindner për Tabela Media.
“Siria nuk duhet të përdoret si zonë e operacioneve për PKK-në për të kryer sulme kundër Türkiyes. Duhet të bëhet një dallim shumë i qartë midis PKK-së dhe kurdëve sirianë në veri”, shtoi ai.
Diplomati gjerman tha se vendet perëndimore mbajnë dialog të vazhdueshëm me Ankaranë për zhvillimet në Siri.
"Ne po bëjmë gjithçka që mundemi për të siguruar që Türkiye të veprojë në harmoni me ne, por nuk ka asnjë garanci për këtë," tha ai, kur u pyet për një operacion të mundshëm ushtarak turk kundër strukturave të PKK-së në Sirinë veriore.
Lindner u shpreh se Berlini ndan pikëpamjen se të gjitha grupet e armatosura në Siri duhet të bashkohen me forcat e reja të sigurisë të qeverisë së Sirisë.
“Qëllimi duhet të jetë që të gjitha milicitë në Siri, jo vetëm ato kurde, të integrohen përfundimisht në forcat e armatosura siriane. Ne jemi duke punuar për këtë”, shtoi ai.
“Ajo që është e rëndësishme për ne tani është se ka një proces të rregullt dhe gjithëpërfshirës. Duhet të ketë hapa dhe etapa të verifikueshme - një pikë e rëndësishme këtu është çështja e pjesëmarrjes së grave. Dhe kurdët, druzët, alavitët dhe të krishterët, si të gjithë sirianët e tjerë, gjithashtu duhet ta shohin veten në këtë proces”, tha Lindner.
Diplomati gjerman theksoi gjithashtu integritetin territorial të Sirisë dhe tha se të gjithë aktorët rajonalë, përfshirë Izraelin, pritet të respektojnë këto kufij.
