Britania e Madhe do të dërgojë rreth 200 ushtarë në Kosovë në mes të tensioneve në rritje në pjesën veriore të vendit, afër kufirit me Serbinë, thuhet në njoftimin e Ministrisë së Mbrojtjes.
Me kërkesë të NATO-s, forcat do të dërgohen në Kosovë për një mision paqeruajtës të NATO-s pas përleshjeve në veri të vendit, thekson ministria.
Rreth 200 ushtarë nga Batalioni i Parë i Regjimentit Mbretëror të Princeshës së Uellsit do t'i bashkohen kontingjentit britanik prej 400 trupash tashmë në Kosovë si pjesë e një stërvitjeje vjetore, thotë ministria.
"Zgjerimi i mbështetjes sonë për Forcën e Kosovës (KFOR) nënvizon përkushtimin tonë të palëkundur ndaj NATO-s dhe sigurisë së rajonit të Ballkanit Perëndimor," tha adm. Tony Radakin, shef i Shtabit të Mbrojtjes.
Më 24 shtator në fshatin Banjska në Kosovën veriore – një rajon afër kufirit serb, me një popullsi të madhe etnike serbe – një përleshje me armë la të vdekur një polic dhe një tjetër të plagosur.
Zona ka qenë skenë e trazirave që nga prilli, kur serbët lokalë etnikë bojkotuan zgjedhjet në veri të Kosovës, të ndjekur nga protesta kundër zgjedhjes së kryetarëve të komunave shqiptarë etnikë.
Javën e kaluar është parë një “dislokim i madh ushtarak serb përgjatë kufirit me Kosovën”, sipas Këshillit të Sigurisë Kombëtare të ShBA-së, zëdhënësi i të cilit e quajti vendosjen “një zhvillim shumë destabilizues”.
Kosova të shtunën i bëri thirrje Serbisë të tërheqë trupat e saj dhe Sekretari i Përgjithshëm i NATO-s Jens Stoltenberg shkroi të premten në X: "Aleatët e NATO-s u takuan sot dhe shprehën shqetësim të thellë për tensionet në veri të Kosovës".
Shqiptarët janë grupi më i madh etnik në Kosovë, të ndjekur nga një pakicë serbe, me rreth gjysma që jetojnë në veri të vendit.
Kosova shpalli pavarësinë nga Serbia në vitin 2008 dhe fitoi njohje nga shumë vende, përfshirë Türkiyen, por Beogradi nuk e ka njohur kurrë Kosovën dhe pretendon se territori i tij është ende pjesë e Serbisë.
