Që nga mëngjesi i sotëm, më shumë se 240 institucione arsimore në mbarë Hungarinë kanë marrë kërcënime me bomba, duke përfshirë të paktën 20 shkolla në kryeqytetin e Budapestit, njoftoi të enjten zëdhënësi i qeverisë hungareze Zoltan Kovacs.
Letrat, "të shkruara keq në hungarishte", ndoshta përmes "Google Translate", shkaktuan evakuime në disa lokacione.
Kryetarët e bashkive në gjithë vendin shpallën gjendje të jashtëzakonshme, duke hapur objekte të përkohshme për studentët dhe mësuesit që nuk mund të kthehen në shtëpi. Ofrohen ushqime dhe prindërit inkurajohen të qëndrojnë të informuar dhe të ndihmojnë aty ku është e mundur.
Policia konfirmoi se e-maile të njëjta u dërguan në disa shkolla dhe nisi hetimet për kërcënime sipas pikës së Kodit Penal për rrezikimin e publikut. Byroja Kombëtare e Hetimit po drejton hetimin dhe njësitë rajonale janë urdhëruar të bashkëpunojnë urgjentisht.
Kërcënimi në Hungari të kujton kërcënimet e vitit të kaluar kundër më shumë se 1.000 shkollave dhe institucioneve në Sllovaki.
Kryeministri hungarez Viktor Orban gjithashtu u shpreh në rrjetet sociale për ta theksuar seriozitetin e situatës.
