Kosova ka finalizuar projektligjin me të cilin do të rregullohen përgatitjet adekuate për organizimin e Lojërave Mesdhetare "Prishtina 2030".
Kryeministri i Kosovës, Albin Kurti, mirëpriti në një takim të përbashkët në Qeverinë e Kosovës përfaqësues të Komitetit Ndërkombëtar të Lojërave Mesdhetare (ICMG), Ministrisë së Kulturës, të Rinisë dhe të Sportit, Komitetit Olimpik të Kosovës dhe Komunës së Prishtinës, si dhe përfaqësues të Komitetit Olimpik Kombëtar Shqiptar dhe Ministrisë së Arsimit dhe Sportit të Shqipërisë.
Siç njofton Zyra e Kryeministrit të Kosovës, temë qendrore e diskutimit ishin përgatitjet dhe hapat e mëtutjeshëm për organizimin e Lojërave Mesdhetare 2030, ku gjatë takimit u kumtua lajmi për finalizimin e Projektligjit për organizimin e Lojërave Mesdhetare 2030, i cili do të procedohet për votim në mbledhjen e radhës të Qeverisë.
Sipas këtij projektligji, Komiteti Organizativ do ta udhëheqë projektin më të madh sportiv në historinë e Republikës së Kosovës. Ai do të përbëhet nga ministra të Qeverisë, përfaqësues të Kuvendit të Republikës, Komitetit Olimpik të Kosovës dhe Komunës së Prishtinës, nën udhëheqjen e Kryeministrit në cilësinë e kryesuesit të Bordit Ekzekutiv të Komitetit Organizativ për Lojërat Mesdhetare, Prishtina 2030.
Kryeministri Kurti dhe zëvendësministrja e Kulturës, e Rinisë dhe e Sportit, Daulina Osmani, falënderuan Sekretarin e Përgjithshëm të ICMG-së, Iakovos Filippousis, për mbështetjen e vazhdueshme, ndërsa Komitetin Olimpik të Kosovës dhe Komunën e Prishtinës për kontributin e dhënë dhe përkushtimin e treguar.
Lojërat Mesdhetare "Prishtina 2030", do të jenë ngjarja më e madhe sportive në histori të vendit, që përmes investimeve do të kontribuojë drejtpërdrejt në përmirësimin dhe avancimin e infrastrukturës sportive, kurse përmes mikpritjes në përfaqësimin dhe promovimin ndërkombëtar të Republikës së Kosovës.
Lojërat Mesdhetare 2030 do të shtrihen në disa komuna të Kosovës dhe në qytetin e Durrësit të Republikës së Shqipërisë.
