Deputeti shqiptar në Kuvendin e Serbisë, Shaip Kamberi ka thënë se në 20 vjetët e fundit, numri i nxënësve në shkollat fillore në Serbi ka rënë 25 për qind, kurse te shqiptarët në Luginën e Preshevës, bëhet fjalë për një rënie marramendëse prej 58 për qind.
Deputeti Kamberi ka shkruar në platformën sociale X se kjo është alarmuese dhe, sipas tij, është rezultat i pakicës së neglizhuar qëllimisht nga qeveria me diskriminim aktiv.
“Në 20 vitet e fundit, numri i nxënësve të shkollave fillore ka rënë 25% në Serbi, por te shqiptarët në Luginën e Preshevës, është një rënie marramendëse prej 58% - më shumë se dyfishi i mesatares kombëtare. Alarmuese! Ky është rezultat i një pakice të shpërfillur qëllimisht nga qeveria me diskriminim aktiv”, ka shkruar Kamberi në X.
