Türkiye pret që Suedia dhe Finlanda të ndërmarrin "hapa konkretë" për t'u bërë anëtarë të NATO-s pasi propaganda e terrorit në këto vende është ende në vazhdim, tha të martën ministri i Mbrojtjes Kombëtare të Türkiyes, Hulusi Akar.
"Ne po ndjekim nga afër situatën në Suedi dhe Finlandë. Fatkeqësisht, ne ende shohim disa veprime dhe imazhe provokuese në këto vende. Ne presim që Suedia dhe Finlanda të ndërmarrin hapa konkretë", tha Akar në deklaratë para gazetarëve.
Vërejtjet e Akarit erdhën përpara takimit të tij me ministrin finlandez të mbrojtjes Antti Kaikkonen të enjten.
Gjatë bisedimeve në kryeqytetin Ankara, Akar dhe Kaikkonen do të diskutojnë çështjet dypalëshe të mbrojtjes dhe të sigurisë, si dhe procesin e anëtarësimit të Finlandës në NATO.
Finlanda dhe Suedia aplikuan zyrtarisht për t'iu bashkëngjitur NATO-n në maj, duke braktisur dekada të mosangazhimit ushtarak, një vendim i nxitur nga lufta e Rusisë kundër Ukrainës.
Por Türkiye, një anëtare e NATO-s për më shumë se 70 vjet shprehu kundërshtime ndaj ofertave të anëtarësimit të tyre, duke i akuzuar të dyja vendet se tolerojnë dhe madje mbështesin grupet terroriste.
Türkiye dhe dy vendet nordike nënshkruan një memorandum në qershor në një samit të NATO-s për të adresuar shqetësimet legjitime të sigurisë së Ankarasë, duke hapur rrugën për anëtarësimin e tyre përfundimtar në Aleancë.
"Ka angazhime të nënshkruara nga Suedia dhe Finlanda, ato duhet të përmbushen. Memorandumi është një fillim, jo një fund. Pasi të bëhen këto, parlamenti turk do të marrë vendimin e tij. Ne po përpiqemi gjithashtu t'i ndihmojmë Suedisë dhe Finlandës”, shtoi Akar.
Sipas Akar, Türkiye nuk ka problem me politikën e dyerve të hapura të NATO-s, por duhet respektuar ndjeshmëria e vendit.
"Terrorizmi është një nga fushat më të mëdha të luftës së NATO-s. Terrorizmi është një problem serioz për të gjitha vendet për momentin. Türkiye është i vetmi vend që lufton më shumë se një organizatë terroriste. Kjo duhet parë dhe të dihet se çfarë bëjmë për këtë çështje që përgjegjësia të rritet", shtoi Akar.
