Të paktën 35 palestinezë u vranë dhe 129 të tjerë u plagosën si rezultat i sulmeve ajrore intensive izraelite në Rafah, në jug të Rripit të Gazës, në 24 orët e fundit, tha një burim mjekësor për Anadolu të mërkurën.
Burimi mjekësor shtoi se viktimat palestineze mbërritën në spitalin e Kuvajtit në qytetin Rafah, duke shtuar se mes tyre ka fëmijë dhe gra.
Që nga e hëna, Rafah ka përjetuar sulme ajrore dhe granatime të intensifikuara izraelite në të gjitha zonat, duke përfshirë dhe zonat e banuara.
Ushtria izraelite filloi të martën pushtimin në zonën lindore të Rafahut, nën të cilën sulmoi dhe pushtoi anën palestineze të kalimit Rafah me Egjiptin, duke mbyllur portën e vetme të palestinezëve të Gazës me botën.
Izraeli ka goditur Rripin e Gazës në shenjë hakmarrjeje për një sulm të 7 tetorit nga Hamasi, i cili vrau rreth 1.200 njerëz. Afro 34.800 palestinezë janë vrarë që atëherë në Gaza, shumica dërrmuese e të cilëve kanë qenë gra dhe fëmijë, ndërsa 78.100 të tjerë janë plagosur, sipas autoriteteve shëndetësore palestineze.
Sipas OKB-së, mbi shtatë muaj pas luftës izraelite, zona të gjera të Gazës janë në gërmadha, duke shtyrë 85% të popullsisë së enklavës në zhvendosje të brendshme mes një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë. Një vendim i përkohshëm në janar tha se është "e besueshme" që Izraeli po kryen gjenocid në Gaza dhe urdhëroi Tel Avivin të ndalojë akte të tilla dhe të marrë masa për të garantuar ofrimin e ndihmës humanitare për civilët në Gaza.
