Të paktën 40 palestinezë u vranë në sulmet ajrore izraelite në gjithë Rripin e Gazës të martën mbrëma dhe të mërkurën në mëngjes, ndërsa lufta gjenocidale e Izraelit vazhdon pavarësisht përpjekjeve për të arritur një armëpushim.
Duke cituar burime lokale, agjencia zyrtare palestineze e lajmeve WAFA raportoi se 13 persona u vranë dhe shumë u plagosën në një sulm ajror izraelit në shtëpinë e familjes Shahin në pjesën jugore të qytetit të Deir al-Balah, në Rripin qendror të Gazës.
Shtatë palestinezë u vranë në një sulm ajror izraelit në shtëpinë e familjes Nassar në kampin e refugjatëve Nuseirat dhe një tjetër palestinez u vra në një sulm të dytë izraelit në një kamp në Rripin qendror të Gazës.
Pesë palestinezë u vranë në dy sulme ajrore izraelite në dy shtëpi në kampin e refugjatëve Bureij.
Në Gaza, dëshmitarët thanë për Anadolu Agency se shtatë palestinezë u vranë në një sulm ajror izraelit që synonte një shkollë ku strehoheshin palestinezët e zhvendosur.
Një sulm i dytë në shtëpinë e familjes Sha'ath në lagjen Naser të qytetit Rafah në Rripin jugor të Gazës mori jetën e një gruaje dhe katër fëmijëve.
Dy palestinezë u vranë në një sulm me dron ndaj një grupi njerëzish në zonën Khirbet Al-Adas të Rafah.
Ushtria izraelite vazhdon luftën e saj gjenocidale në Gaza, në të cilën afro 46.600 palestinezë, kryesisht gra dhe fëmijë, janë vrarë që nga 7 tetori 2023, pavarësisht një rezolute të Këshillit të Sigurimit të OKB-së që bën thirrje për një armëpushim të menjëhershëm.
Gjykata Ndërkombëtare Penale lëshoi urdhërarreste në nëntor për Netanyahun dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid para Gjykatës Ndërkombëtare të Drejtësisë për luftën në enklavë.
