Numri i viktimave nga një shtypje masive në një stacion hekurudhor në kryeqytetin indian, New Delhi, është rritur në 18, konfirmuan zyrtarët të dielën.
Policia e Delhit konfirmoi numrin e viktimave nga incidenti, i cili ndodhi në Stacionin Hekurudhor të New Delhi-t të shtunën në mbrëmje.
Zyrtarët e hekurudhave njoftuan se ka nisur një hetim mbi këtë ngjarje, të cilën ata e kanë atribuuar një "rritjeje të papritur" të numrit të pasagjerëve.
Zëdhënësi i hekurudhave, Himanshu Shekhar Upadhyay, u tha gazetarëve të dielën se një burrë rrëshqiti dhe ra në shkallë, duke rrëzuar shumë njerëz që ndodheshin pas tij, gjë që shkaktoi shtypjen masive.
Zyrtari i Forcës Kombëtare të Reagimit ndaj Fatkeqësive, Daulat Ram Chaudhary, deklaroi se situata në stacion është normalizuar dhe të gjithë të plagosurit janë evakuuar.
Hekurudhat Indiane kanë shpallur kompensime financiare për viktimat, duke premtuar rreth 11.500 dollarë për familjet e të ndjerëve dhe rreth 2.884 dollarë për ata që janë plagosur rëndë në incident.
Zyrtarët raportuan se stacioni u përball me një fluks të madh pasagjerësh për shkak të pelegrinëve që po udhëtonin për të marrë pjesë në Maha Kumbh Mela, festivali më i madh hindu në Indi, i cili po zhvillohet në shtetin fqinj të Uttar Pradesh-it.
Ndërsa shumë zyrtarë, përfshirë Kryeministrin Narendra Modi, shprehën ngushëllime për viktimat, lideri i opozitës, Rahul Gandhi, kritikoi qeverinë, duke deklaruar se incidenti “thekson edhe një herë dështimin e hekurudhave dhe neglizhencën e qeverisë.”
"Duke marrë parasysh numrin e madh të pelegrinëve që po udhëtojnë drejt Prayagraj, duhej të ishin marrë masa më të mira në stacion," shkroi ai në X.
Disa dëshmitarë okularë thanë për mediat lokale se nuk kishte asnjë person të pranishëm për të kontrolluar turmën në momentin e incidentit.
Më 29 janar, të paktën 30 persona humbën jetën në një tjetër shtypje masive gjatë të njëjtit festival, i cili mbahet çdo 12 vjet në brigjet e lumit në Prayagraj, Uttar Pradesh. Këtë vit, festivali zhvillohet nga 13 janari deri më 26 shkurt.
Prayagraj, i njohur më parë si Allahabad, konsiderohet një vend i shenjtë për hinduizmin, pasi është vendndodhja e Triveni Sangam, bashkimit të shenjtë të lumenjve Ganges, Yamuna dhe Saraswati mitik.
