Koreja e Veriut ka ndryshuar kushtetutën e saj për të përcaktuar zyrtarisht Korenë e Jugut si një shtet "armiqësor", duke përmendur kërcënimet e sigurisë dhe përshkallëzimin e tensioneve midis dy vendeve.
"Kjo është një masë e pashmangshme dhe legjitime e marrë në përputhje me kërkesat e Kushtetutës së DPRK-së (Republika Popullore Demokratike e Koresë), e cila e përcakton qartë ROK-un (Republikën e Koresë) si një shtet armiqësor, për shkak të rrethanave të rënda të sigurisë që ndodhin në prag të paparashikueshëm të luftës për shkak të provokimeve të rënda politike dhe ushtarake të forcave armiqësore", raportoi Agjencia Qendrore Koreane e Lajmeve (KCNA).
Ky konfirmim shënon herën e parë që Koreja e Veriut e ka quajtur në mënyrë eksplicite Korenë e Jugut si një "shtet armiqësor" pasi Asambleja Supreme Popullore (SPA), organi legjislativ i Koresë së Veriut, u mblodh javën e kaluar dhe ndryshoi kushtetutën.
Duke rritur tendosjen, sot Koreja e Veriut gjithashtu njoftoi se ka ndërprerë lidhjet tokësore me Korenë e Jugut, duke mbyllur lidhjet rrugore dhe hekurudhore në pjesët lindore dhe perëndimore të kufirit.
Në muajin janar, udhëheqësi i Koresë së Veriut, Kim Jong-un, inicioi një propozim për të ripërcaktuar statusin e Koresë së Jugut dhe tha se të dy kombet nuk mund të ndjekin rrugën drejt ribashkimit kombëtar së bashku. Gjatë një fjalimi në SPA, Kim bëri thirrje për një ndryshim, duke e përshkruar Korenë e Jugut si "armiku kryesor i pandryshueshëm".
Vendimi për ndryshimin e kushtetutës dhe shpalljen e Koresë së Jugut si një shtet armiqësor pason një sërë përshkallëzimi. Vitin e kaluar, Koreja e Veriut braktisi një marrëveshje ndër-koreane të vitit 2018 që kishte krijuar zona tampon përgjatë kufijve tokësor dhe detar dhe zona të ndalimit të fluturimeve mbi zonën e çmilitarizuar. Pezullimi i kësaj marrëveshje rivendosi aktivitetet ushtarake në shkallë të plotë pranë kufirit ndër-korean.
Në përgjigje të tensioneve të rritura, dje Koreja e Veriut raportoi se mbi 1,4 milion të rinj dhe studentë kishin dalë vullnetarë për t'u bashkuar ose ribashkuar me ushtrinë e saj. Njoftimi pasoi pretendimet e Phenianit se dronët e Koresë së Jugut hynë në hapësirën ajrore të Koresë së Veriut pranë kryeqytetit, një pretendim që Koreja e Jugut nuk e ka konfirmuar.
