Koreja e Veriut ka lëshuar një tjetër raketë balistike, në vazhdën e testimeve rekord në fillim të këtij muaji.
Ushtria e Seulit tha të mërkurën se kishte "detektuar një raketë balistike me rreze të shkurtër të lëshuar nga Koreja e Veriut në Detin Lindor nga Sukchon, Provinca Jugore Pyongan, rreth orës 15:31", duke iu referuar trupit ujor të njohur gjithashtu si Deti i Japonisë.
"Duke forcuar mbikëqyrjen dhe vigjilencën, ushtria e Koresë së Jugut ruan gatishmërinë e plotë ndërsa bashkëpunon ngushtë me Shtetet e Bashkuara," shtoi ai.
Lëshimi i kësaj rakete vjen gjatë numërimit të votave në Shtetet e Bashkuara në zgjedhjet e mesmandatit për Dhomën e Përfaqësuesve dhe Senatin, për çka agjencia e spiunazhit të Koresë së Jugut kishte paralajmëruar më parë se do të ishte një moment i mundshëm për Kim Jong-un për të kryer një provë bërthamore të pritur prej kohësh.
Japonia konfirmoi gjithashtu lëshimin e raketës. Qeverinë në Twitter tha se Pyongyang "ka lëshuar një raketë të dyshuar balistike". Në fillim të këtij muaji, Koreja e Veriut kreu një sërë testimesh, duke përfshirë një raketë balistike ndërkontinentale, për të cilën Seuli tha se dukej se kishte dështuar.
Pyongyang lëshoi gjithashtu një raketë balistike me rreze të shkurtër veprimi që kaloi kufirin de fakto dhe u ul pranë ujërave territoriale të Jugut për herë të parë që nga fundi i Luftës Koreane në 1953.
