Zëdhënësi i Kremlinit, Dmitry Peskov, njoftoi se një takim Rusi-ShBA do të zhvillohet nesër në kryeqytetin e Arabisë Saudite, Riad.
Duke folur në një konferencë për media në Moskë, Peskov deklaroi se delegacioni rus do të udhëhiqet nga ministri i Jashtëm Sergey Llavrov dhe ndihmësi i presidentit për punët e jashtme, Yury Ushakov.
“Sot, në emër të presidentit (Vlladimir) Putin, ministri i Jashtëm Llavrov dhe ndihmësi i presidentit Ushakov po fluturojnë për në Riad. Ata pritet të takohen me homologët e tyre amerikanë të martën, ku diskutimet do të fokusohen kryesisht në rivendosjen e spektrit të plotë të marrëdhënieve ruso-amerikane", tha Peskov.
Ai gjithashtu tha se bisedimet në takim do të fokusohen në marrëdhëniet dypalëshe Rusi-ShBA, përgatitjet për negociatat për gjetjen e zgjidhjes për Ukrainën, si dhe bisedimet për një takim të mundshëm midis liderëve të dy vendeve, Vlladimir Putin dhe Donald Trump.
Arabia Saudite u zgjodh si vend, sepse është e pranueshme për të dyja palët, vuri në dukje Peskov, duke shtuar se është herët për pjesëmarrjen evropiane në bisedimet për gjetjen e zgjidhjes për Ukrainën.
