Ministri i Jashtëm i Administratës së re siriane, Asaad al-Shaibani, tha dje se heqja e sanksioneve ekonomike prej dekadash është “çelësi i stabilitetit” në vendin e tij.
“Fokusi kombëtar tani është në shndërrimin e sfidave në mundësi dhe Damasku mirëpret kthimin e refugjatëve për të ndihmuar në rindërtimin e Sirisë”, tha al-Shaibani gjatë një takimi me ish-kryeministrin britanik Tony Blair në margjinat e Forumit Ekonomik Botëror në Davos.
Ai theksoi se Siria tani ka hyrë në një epokë të re dhe se Administrata e re dëshiron që Siria të jetë një vend paqësor, i cili nuk do të jetë kërcënim për askënd.
“Është thelbësore të binden sirianët si brenda dhe jashtë vendit se qeveria e tyre e re dëshiron paqe, siguri dhe stabilitet”, tha ai.
Ai tha gjithashtu se Siria po punon për të krijuar partneritete me vendet e Gjirit në sektorët e energjisë dhe energjisë elektrike.
Al-Shaibani shtoi se Siria do të hapë ekonominë e saj ndaj investimeve të huaja në fazën tjetër.
“Nëse bota dëshiron që Siria të dalë nga tragjedia e saj, ajo duhet të mbështesë ëndrrat e popullit sirian. Ne i bëjmë thirrje komunitetit ndërkombëtar që të mbështesë Sirinë në formësimin e së ardhmes së saj”, tha al-Shaibani.
Sanksionet kundër Sirisë datojnë që nga dhjetori i vitit 1979, kur ShBA-ja e etiketoi Sirinë një shtet sponsorizues të terrorizmit. Ky emërtim solli ndalime eksporti, kufizime shitjesh dhe kufizime të ndryshme financiare. Perëndimi vendosi gjithashtu sanksione shtesë gjatë regjimit të Bashar al-Assad, i cili u rrëzua nga pushteti më 8 dhjetor të vitit të kaluar.
