Më shumë se 60 palestinezë u vranë në sulmet e kryera nga ushtria izraelite gjatë natës në pjesët qendrore dhe jugore të Rripit të Gazës.
Sipas lajmit të agjencisë zyrtare palestineze WAFA, ushtria izraelite që nga mbrëmë ka vazhduar sulmet në pjesët qendrore dhe jugore të Gazës. Të paktën 34 palestinezë humbën jetën në sulmet ajrore të ushtrisë izraelite në qytetin Deir al-Belah në pjesën qendrore të Gazës dhe kampin e refugjatëve Nuseirat. Shumë palestinezë humbën jetën dhe u plagosën si pasojë e shembjes së disa ndërtesave në sulmet ajrore në rrethin Zaitoun të qytetit të Gazës. Thuhet se kishte dhjetëra persona nën rrënoja, ndërsa ekipet e kërkim-shpëtimit dhe ambulancat nuk mundën të arrinin në zonë për shkak të sulmeve intensive dhe pengesave izraelite.
Në lagjet Tel el-Heva, Shujaiyye dhe Es-Sabra të qytetit të Gazës ka vazhduar zjarri intensiv i artilerisë.
Jugu i Gazës vazhdon të bombardohet
Ushtria izraelite vazhdoi sulmet ajrore në qytetin Rafah në jug të Rripit të Gazës, ku janë strehuar rreth 1,4 milion njerëz. Në sulmin në lagjen Jenineh në pjesën lindore të Rafahut, u vranë 8 persona, përfshirë fëmijë dhe disa të tjerë u plagosën.
Të paktën 26 persona u vranë në sulmet e ushtrisë izraelite, e cila hyri në rajonin Al-Mevasi të Khan Younis në jug të Gazës, kundër palestinezëve të zhvendosur. Dje ushtria izraelite hyri në rajonin Mevasi, që ndodhet në perëndim të Khan Younis, për të cilin më parë kishte pretenduar se ishte "i sigurt".
Rajoni Mevasi ku ndodhen shumë tenda të palestinezëve të zhvendosur, ishte ndër vendet që Izraeli më parë kishte pretenduar se ishin "të sigurta". Ushtria izraelite kërkonte që palestinezët në qytetin e Gazës dhe pjesët veriore dhe qendrore të Rripit të Gazës të shkonin në këtë zonë.
Ka përleshje të dhunshme midis forcave izraelite që hyjnë në rajon nga toka dhe grupeve të rezistencës palestineze. Pjesa Khan Younis e rajonit Mevasi, e cila është e ndarë në dy rajone, ndodhet në jugperëndim të qytetit dhe shtrihet në afërsi të qytetit të Deir el-Belah.
Pjesa e rajonit e lidhur me qytetin Rafah, i cili kryesisht përbëhet nga toka bujqësore dhe duna ranore, ndodhet në pjesën më veriperëndimore të qytetit. Vlerësohet se në Mevasi ka rreth 9 mijë palestinezë dhe 2 mijë prej tyre jetojnë në Rafah.
Ushtria izraelite që nga 22 janari ka kryer sulme ajrore dhe artilerike kundër Khan Younis dhe spitaleve përreth në rajon. Shumë palestinezë janë zhvendosur për shkak të pushtimit të kryer nga automjetet ushtarake nga pjesët perëndimore dhe jugore të qytetit.
