Udhëheqësi i konservatorëve gjermanë, fituesi i zgjedhjeve të djeshme, Friedrich Merz, tha të hënën se do të dëshironte të priste kryeministrin izraelit Benjamin Netanyahu në Berlin, pavarësisht urdhrit të arrestit të lëshuar nga Gjykata Penale Ndërkombëtare.
Duke folur në një konferencë shtypi në Berlin, Merz, kancelari i ardhshëm më i mundshëm i Gjermanisë, konfirmoi se Netanyahu e kishte telefonuar të dielën për ta uruar për fitoren e tij zgjedhore dhe ata diskutuan një takim të mundshëm pas formimit të qeverisë së re gjermane.
“Ju e dini që ne e njohim mirë njëri-tjetrin dhe i thashë gjithashtu se duhet të shihemi menjëherë pas formimit të qeverisë dhe në rast se ai planifikon të vizitojë Gjermaninë”, tha Merz.
Ai tha se i kishte premtuar Netanyahut se "do të gjente një mënyrë që të mund të vizitonte Gjermaninë dhe të largohej përsëri pa u arrestuar".
“Mendoj se është krejtësisht absurde ideja që kryeministri izraelit nuk mund të vizitojë Republikën Federale të Gjermanisë, ai do të mund të vizitojë Gjermaninë”, shtoi ai.
Në nëntor të vitit të kaluar, GJNP lëshoi urdhra arresti për Netanyahun dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.
Më shumë se 48.300 palestinezë, kryesisht gra dhe fëmijë, janë vrarë në sulmet izraelite në Rripin e Gazës që nga tetori i vitit 2023.
