Policia gjermane regjistroi 258 krime islamofobike në gjysmën e parë të vitit 2023, sipas shifrave të publikuara të hënën nga parlamenti.
Më shumë se një duzinë xhamish u sulmuan midis janarit dhe qershorit dhe dhjetëra myslimanë u sulmuan fizikisht ose u ngacmuan verbalisht në rrugë ose në vende publike. Në këto sulme u plagosën 17 persona.
Ministria e Brendshme gjermane publikoi shifrat në përgjigje të një pyetjeje parlamentare nga Partia e Majtë e opozitës.
Sipas informacionit të dhënë nga ministria, rastet përfshinin krime të urrejtjes, letra kërcënuese, sulme verbale dhe fizike, vandalizëm ose dëmtim të pronës.
Rreth 124 nga këto raste janë raportuar në periudhën janar-mars të këtij viti, dhe 134 të tjerë janë regjistruar në periudhën prill-qershor.
Ndërkohë që janë hapur hetime penale kundër disa të dyshuarve, deri më tani nuk është bërë asnjë arrestim, kanë thënë zyrtarë të Ministrisë së Brendshme.
Shumica e krimeve sipas të dhënave zyrtare janë kryer në shtetet lindore të Gjermanisë, bastioni tradicional i partive të ekstremit të djathtë. Por, një numër i madh i krimeve islamofobike të urrejtjes u regjistruan gjithashtu në kryeqytetin e Gjermanisë, në Berlin dhe në qytetet perëndimore të Këlnit, Frankfurtit dhe Mynihut.
Gjermania ishte dëshmitare e rritjes së racizmit dhe ksenofobisë vitet e fundit, të nxitura nga propaganda e grupeve të ekstremit të djathtë, antisemitë dhe antimyslimanë, duke përfshirë partinë opozitare Alternativa për Gjermaninë, ose AfD.
Një vend me mbi 84 milionë banorë, Gjermania ka popullsinë e dytë më të madhe myslimane në Evropën Perëndimore pas Francës. Sipas shifrave zyrtare, ajo është shtëpia e afro 5 milionë myslimanëve.
