Organizata e Bashkëpunimit Islamik (OBI) ka përshëndetur vendimin e Gjykatës Ndërkombëtare Penale (GjNP) për lëshimin e fletrarrestit për kryeministrin izraelit Benjamin Netanyahu dhe ish-ministrin e mbrojtjes Yoav Gallant me akuza për krime lufte dhe krime kundër njerëzimit në Gaza.
Në një deklaratë të enjten vonë, OBI-ja e përshkroi masën si "një hap vendimtar drejt përfundimit të dekadave të mosndëshkimit të gëzuar nga zyrtarët izraelitë" dhe "kthimit të besimit në drejtësinë dhe përgjegjësinë ndërkombëtare".
Organizata theksoi se vendimi "përfaqëson një fitore për legjitimitetin ndërkombëtar dhe sundimin e ligjit".
OBI-ja i bëri thirrje komunitetit global, veçanërisht vendeve anëtare të Statutit të Romës, ta "respektojnë dhe ta zbatojnë këtë vendim të rëndësishëm".
Ai gjithashtu i kërkoi Gjykatës Ndërkombëtare të Drejtësisë (GjND) ta "përshpejtojë gjykimin e saj mbi kryerjen e gjenocidit nga Izraeli kundër popullit palestinez".
Duke theksuar krizën e vazhdueshme humanitare, OBI-jai bëri thirrje Këshillit të Sigurimit të OKB-së që "të marrë masa të menjëhershme dhe efektive për t'i zbatuar rezolutat e tij".
Organizata kërkoi "një armëpushim gjithëpërfshirës dhe të përhershëm për t'i dhënë fund agresionit ushtarak dhe gjenocidit të kryer nga Izraeli kundër palestinezëve" dhe bëri thirrje për "ndihmë humanitare të papenguar për të arritur në të gjitha zonat e Rripit të Gazës".
Izraeli ka nisur një luftë gjenocidale në Rripin e Gazës pas një sulmi ndërkufitar nga grupi palestinez Hamas në tetor të vitit të kaluar, duke vrarë më shumë se 44.000 njerëz, shumica prej tyre gra e fëmijë, si dhe duke plagosur mbi 104.000.
Viti i dytë i gjenocidit në Gaza ka tërhequr një dënim ndërkombëtar në rritje, me zyrtarë dhe institucione që i etiketojnë sulmet dhe bllokimin e dërgesave të ndihmave si një përpjekje të qëllimshme për të shkatërruar një popullsi.
GjNP-ja njoftoi në një lëvizje historike të enjten se lëshoi urdhërarrest për Netanyahun dhe Gallant për krime lufte dhe krime kundër njerëzimit në Gaza.
Izraeli gjithashtu përballet me një akuzë gjenocidi në Gjykatën Ndërkombëtare të Drejtësisë për luftën e tij vdekjeprurëse në Gaza.
