Organizata Botërore e Shëndetësisë (OBSh) ka bërë të ditur se numri i përdoruesve të duhanit në nivel global në dy vitet e fundit ka shënuar ulje me rreth 19 milionë njerëz.
“Në mbarë botën ka 1.25 miliard përdorues të rritur të duhanit, sipas vlerësimeve të fundit në raportin e OBSh-së për tendencat globale të duhanit të publikuar sot. Ky është një lajm i mirëpritur, veçanërisht pasi numri parashikohet të vazhdojë të bjerë pasi gjithnjë e më shumë njerëz e lënë duhanin ose nuk e fillojnë”, tha në një konferencë për media në Gjenevë drejtori i promovimit të shëndetit të OBSH-së, Ruediger Krech.
“Kjo është pavarësisht rritjes së vazhdueshme të popullsisë së botës, ku u shtuan afërsisht 149 milionë të rritur gjatë të njëjtës periudhë”, theksoi ai.
Ai theksoi se normat e përdorimit të duhanit në nivel global kanë vazhduar të bien, me vetëm një në pesë të rritur që konsumojnë duhan në vitin 2022, një rënie domethënëse nga një në tre të rritur në vitin 2000.
Krech tha se 150 vende janë tani në një prirje të rënies në përdorimin e duhanit, me 56 prej tyre tashmë duke ndjekur objektivin global për një reduktim prej 30 për qind deri në vitin 2025.
Sipas tij, bota kolektivisht do të bëjë vetëm një reduktim relativ prej 25 për qind në përdorimin e duhanit nëse nuk bëhen përpjekje më të bashkërenduara për të miratuar masa më të forta të kontrollit të duhanit.
Aktualisht, theksoi Krech, grupi i vendeve me të ardhura të ulëta dhe të mesme po përjetojnë uljet më të shpejta të përdorimit të duhanit, pavarësisht se mbajnë normat më të larta të përdorimit të duhanit.
Sipas raportit të paraqitur nga Krech, prevalenca më e lartë e përdoruesve të duhanit është në rajonin e Azisë Juglindore të OBSh-së, ndërsa më e ulëta është në rajonin afrikan.
Krech u kërkoi vendeve të vazhdojnë me zbatimin e politikave të kontrollit të duhanit.
