Organizata terroriste YPG/PKK, e cila ka pushtuar më shumë se 70 për qind të vendburimeve të naftës në Siri, sipas burimeve në terren po uzurpon naftën siriane me vlerë 2,5 miliardë dollarë në vit përmes shitjeve të brendshme dhe ndërkombëtare.
Aktualisht, fushat Al-Omar, Izbe, Tanak dhe Conoco në Deir ez-Zor në verilindje të Sirisë, si dhe Suweidiyah dhe Rumeylan në provincën verilindore Hasakah janë ndër fushat më të mëdha të naftës dhe gazit të pushtuar nga YPG/PKK-ja terroriste.
Në vitin 2011, kur filloi lufta civile në Siri, sipas të dhënave nga Ministria e Naftës dhe Burimeve Natyrore, prodhoheshin 386 mijë fuçi naftë në ditë, me rezerva nafte të përqendruara në verilindje të vendit.
Sipas informacioneve që Anadolu ka siguruar nga burime përgjegjëse për shpimet dhe dërgesat në fushat e operuara nga grupet terroriste, YPG/PKK-ja terroriste nxjerr të paktën 150 mijë fuçi naftë në ditë në rajonet e pushtuara.
Gazetarët e Anadolut kapën pamjet e pompave me kuaj të operuara nga terroristët e YPG/PKK-së në provincën Hasakah dhe të kamionëve që transportonin naftë në Irakun verior përmes pikës kufitare Samalka.
Pamjet tregojnë dhjetëra kamionë të ngarkuar me naftë që hyjnë në Irakun verior përmes vendkalimeve Samalka dhe Mahmudiyah.
Terroristët e YPG/PKK-së dërgojnë mijëra fuçi naftë bruto çdo ditë në Irakun verior për shkak të infrastrukturës teknike dhe problemeve logjistike në prodhimin e naftës.
Derisa një pjesë e naftës së rafinuar jashtë kthehet në rajonet e pushtuara nga grupi terrorist, pjesa tjetër transportohet me cisterna në Irakun verior dhe shitet ilegalisht atje. Organizata terroriste e shet naftën që dërgon në Irakun verior me 30 dollarë për fuçi.
- Shumica e naftës shkon për regjimin e Assadit
Megjithëse ShBA-ja vendosi të ashtuquajturat sanksione të Cezarit ndaj regjimit sirian të Assadit, YPG/PKK-ja terroriste ia shet regjimit pjesën më të madhe të naftës së papërpunuar dhe të përpunuar.
Grupi dërgon një pjesë të naftës në cisterna përmes lumit Eufrat me kontrabandistët me të cilët bashkëpunon dhe pjesën tjetër përmes pikës së tranzitit në rrethin Tabqa të qytetit sirian Raqqa.
Grupi terrorist realizon dërgesat e naftës me kamionë që i përkasin Husam Katiricit, i cili u vendos në listën e sanksioneve të ShBA-së në shtator të vitit 2018.
Sipas informacioneve nga burimet në pikën e kalimit në Tabqa, automjetet që i përkasin kompanisë së Katiricit transportojnë mesatarisht 200 cisterna nafte çdo ditë në zonat e kontrolluara nga regjimi i Assadit.
YPG/PKK-ja terroriste i shet regjimit rreth 35 mijë fuçi naftë çdo ditë përmes qyteteve Raqqa dhe Deir ez-Zor. Grupi terrorist ia shet regjimit me 70 dollarë për fuçi.
Anadolu siguroi gjithashtu informacione për sasinë e naftës që grupi terrorist trafikon në mënyrë të paligjshme dhe çmimet e regjistruara këtë vit.
Grupi terrorist fiton 900 mijë dollarë në ditë nga 30 mijë fuçi naftë që shet në Irakun verior me 30 dollarë për fuçi ose rreth 328,5 milionë dollarë në vit. Ajo fiton 2,45 milionë dollarë në ditë dhe më shumë se 894 milionë dollarë në vit nga 35 mijë fuçi naftë që kontrabandon në rajonin e regjimit sirian.
- 1,2 miliard dollarë në vit për aktivitete terroriste
Në këtë mënyrë, të ardhurat vjetore të YPG/PKK-së terroriste nga nafta që i shet regjimit të Assadit dhe Irakut verior tejkalojnë 1,2 miliard dollarë.
85 mijë fuçitë e mbetura të naftës së papërpunuar në ditë u shiten tregtarëve dhe kontrabandistëve në rajonin e pushtuar nga grupi terrorist me një mesatare prej 42 dollarë për fuçi. Me 3,57 milionë dollarë në ditë, kjo në të ardhura vjetore është 1,3 miliard dollarë.
Kështu, grupi terrorist uzurpon çdo vit naftën e sirianëve me vlerë 2,5 miliardë dollarë.
Duke marrë parasysh që YPG/PKK-ja terroriste e mori kontrollin e rajonit nga grupi terrorist DEASH në fund të vitit 2017 me mbështetjen e SHBA-së, e cila për vite me radhë ka rezistuar ndaj njohjes së provave të shumta të ofruara nga Türkiye se YPG/PKK-ja është një grup terrorist, bëhet e qartë se grupi i terrorit ka hedhur një shumë më të madhe në arkat e tij në gjashtë vjet e gjysmë që nga ajo kohë.
Pas hyrjes në arkat e YPG/PKK-së terroriste, fondet përdoren nga grupi terrorist në fushatën e tij separatiste në Siri, si dhe në përpjekjet e grupit për të formuar një brez terrorist përgjatë kufijve të Türkiyes dhe për të terrorizuar vendasit në Sirinë verilindore.
Në fushatën e saj terroriste mbi 40-vjeçare kundër Türkiyes, PKK-ja e listuar si një organizatë terroriste nga Türkiye, SHBA-ja dhe BE-ja, ka qenë përgjegjëse për vdekjen e më shumë se 40 mijë njerëzve, duke përfshirë gra, fëmijë dhe foshnja. YPG-ja është dega siriane e PKK-së.
