Përdorimi i dollarit amerikan në tregtinë midis vendeve anëtare të BRICS-it po zvogëlohet ndërsa ato lëvizin drejt monedhave kombëtare, tha të martën presidenti rus Vlladimir Putin.
Duke folur nëpërmjet video-lidhjes me pjesëmarrësit në fillimin e Samitit triditor të BRICS-it në Johanesburg të Afrikës së Jugut, Putini tha se procesi objektiv dhe i pakthyeshëm i dedollarizimit të ekonomive të BRICS-it po fiton ritëm.
“Vitin e kaluar ai ishte vetëm 28,7%. Rastësisht, gjatë këtij samiti, ne do të diskutojmë në detaje gjithë gamën e çështjeve që lidhen me kalimin në monedhat kombëtare në të gjitha fushat e bashkëpunimit ekonomik midis pesë kombeve tona”, tha ai.
Ai tha se Banka e Re për Zhvillim BRICS, si një alternativë ndaj institucioneve financiare perëndimore, ka një rol të madh për të luajtur në këto përpjekje.
Udhëheqësi rus, i cili po përballet me një urdhër arresti ndërkombëtar për krime të dyshuara lufte në Ukrainë, nuk mund të merrte pjesë personalisht në këtë ngjarje.
Presidenti brazilian Luiz Inacio Lula da Silva, presidenti kinez Xi Jinping, presidenti i Afrikës së Jugut Cyril Ramaphosa dhe kryeministri indian Narendra Modi po marrin pjesë personalisht në samit.
BRICS-i është një bllok i ekonomive në zhvillim që përfshin Brazilin, Rusinë, Indinë, Kinën dhe Afrikën e Jugut. Aktualisht përbën një të katërtën e ekonomisë globale, duke zënë një të pestën e tregtisë globale dhe është shtëpia e më shumë se 40% të popullsisë së botës.
“Do të doja të theksoja se pjesa e vendeve të BRICS-it, me një popullsi prej 3 miliardë banorësh, tani përbën gati 26% të PBV-së globale”, tha Putini.
Putini tha gjithashtu se vendet e BRICS-it janë përpara G-7-shit për sa i përket barazisë së fuqisë blerëse, e cila parashikohet për vitin 2023 në 31,5% kundrejt 30%.
Më tej, ai tha se, gjatë dekadës së fundit, investimet e ndërsjella midis vendeve të BRICS-it janë gjashtëfishuar.
Putini tha se bashkëpunimi midis anëtarëve të BRICS-it bazohet në parimet e barazisë, mbështetjes së partnerit dhe respektimit të interesave të njëri-tjetrit.
Ai dënoi gjithashtu sanksionet e vendosura ndaj vendit të tij, duke thënë se situata ekonomike globale është prekur rëndë nga praktika e paligjshme e sanksioneve dhe ngrirja e paligjshme e aseteve të shteteve sovrane.
