Seanca dyditore në Gjykatën Ndërkombëtare të Drejtësisë (GjND) në Hagë filloi të enjten me vërejtjet e delegacionit të Afrikës së Jugut, e cila nënvizoi "shkeljen e qëllimshme" të urdhëresave detyruese të Gjykatës nga Izraeli.
Afrika e Jugut kërkoi që këto seanca të bëjnë presion për masa të mëtejshme të përkohshme kundër Izraelit, duke thënë se ishte e detyruar të kthehej në gjykatën e lartë të OKB-së për shkak të "shkatërrimit të vazhdueshëm të popullit palestinez".
Duke nënvizuar se sulmet e Izraelit në Gaza janë përshkallëzuar, RAJ-i tha gjatë seancës se Tel Avivi "po shkel qëllimisht urdhëresat detyruese të kësaj gjykate".
"Mosndëshkimi i institucionalizuar" e ka bërë Izraelin të përfshihet në "gjenocid" të vazhdueshëm, paralajmëruan, duke shtuar se: "Afrika e Jugut është këtu sepse populli palestinez po përballet me gjenocidin në Gaza dhe urdhrat tuaja të mëparshme nuk kanë arritur t'i mbrojnë ata nga ai".
“Ose për shkak të mungesës së qartësisë se çfarë saktësisht kërkonin urdhëresat, ose për shkak se Izraeli zgjodhi t'i injoronte ato, ato nuk ishin efektive”, shtuan nga Afrika e Jugut.
Mes të tjerash, në seancë u tha se e drejta për vetëmbrojtje "nuk i jep leje shtetit të përdorë dhunë të pakufizuar", as nuk mund "të justifikojë kurrë gjenocidin".
Duke kujtuar vendimin e gjykatës nga viti 2004, Afrika e Jugut tha se "shteti pushtues nuk ka të drejtë të vetëmbrohet kundër territorit që pushton".
“Gjëja kryesore sot është se qëllimi i Izraelit për fshirjen e Gazës nga harta do të arrihet së shpejti”, theksoi Republika e Afrikës së Jugut.
