Zëdhënësi i Kremlinit, Dmitry Peskov, ka deklaruar se Rusia nuk do të diskutojë kurrë ndonjë shkëmbim të territoreve të saj, duke hedhur poshtë një propozim të presidentit ukrainas, Volodymyr Zelenskyy, transmeton Anadolu.
Duke folur në një konferencë për media në Moskë, Peskov theksoi se qëndrimi i Moskës për integritetin e saj territorial mbetet i pandryshuar.
"Rusia nuk do të diskutojë kurrë shkëmbimin e territoreve të saj", tha ai.
Në konferencë ai gjithashtu foli për tema të tjera, përfshirë qëndrimin e Rusisë për negociatat me Ukrainën, orarin e presidentit Vlladimir Putin dhe akuzat për krime nga forcat ukrainase në rajonin Mykolaiv-Daryino të Ukrainës.
Lidhur me lirimin e kësaj jave të shtetasit amerikan Marc Fogel, Peskov tha se ai është shkëmbyer me një shtetas rus të burgosur në ShBA.
Përveç kësaj, ai përsëriti se forcat ukrainase të pranishme në atë që ai e quajti territor rus do të "eliminohen dhe dëbohen".
Më herët, Zelenskyy tha se planifikon t'i propozojë Moskës një shkëmbim territoresh nëse presidenti i ShBA-së, Donald Trump, arrin të organizojë negociata.
"Ne do të shkëmbejmë një territor me një tjetër", citohet të ketë thënë Zelenskyy.
Megjithatë, ai nuk specifikoi se cilin territor të kontrolluar nga Rusia të Ukrainës do ta kërkonin në këmbim, duke shtuar se "të gjitha territoret tona janë të rëndësishme, nuk ka përparësi".
