Kancelari i Gjermanisë, Olaf Scholz, ka paralajmëruar se vendi i tij ende po përballet me një betejë të ashpër kundër ekstremistëve dhe populistëve.
“Nuk është vetëm në Gjermaninë Lindore që ne përjetojmë zgjedhje shtetërore ku ndonjëherë deri në një e treta e votuesve zgjedhin politikë autoritare dhe nacional-radikale”, tha Scholz në një ceremoni të organizuar në përkujtim të unitetit gjerman në qytetin Schwerin.
Kur bëhet fjalë për populistët që luftojnë demokracinë liberale, theksoi ai, kjo është katastrofike dhe e dëmshme për gjithë vendin, ekonominë dhe reputacionin gjerman në botë.
Kancelari gjerman paralajmëroi se “do të duhet ende shumë punë për ta kthyer këtë zhvillim”.
Qeveria gjermane e konsideron ekstremizmin e ekstremit të djathtë si kërcënimin më të madh për demokracinë në vend.
"Ekstremizmi i krahut të djathtë mbetet një sfidë e vazhdueshme pasi është kërcënimi më i madh ekstremist për rendin themelor demokratik", sipas ministres gjermane të Punëve të Brendshme, Nancy Faeser.
Muajin e kaluar, partia e ekstremit të djathtë e Gjermanisë Alternativa për Gjermaninë (AfD) festoi një "sukses historik" me një fitore të madhe në shtetin lindor Thuringia.
Rezultati i dha së djathtës ekstreme fitoren e saj të parë në zgjedhjet e parlamentit shtetëror që nga Lufta e Dytë Botërore, megjithëse ajo nuk ka pothuajse asnjë mundësi për të formuar një qeveri në Thuringia, sepse partitë e tjera nuk kanë gjasa të punojnë me të. Ndërkohë, AfD-ja doli e dyta në shtetin fqinj të Saksonisë.
Kancelari Scholz i quajti rezultatet e zgjedhjeve "të hidhura" dhe u kërkoi partive të tjera kryesore të formojnë qeveri shtetërore pa të djathtën ekstreme.
"AfD-ja po e dëmton Gjermaninë. Ajo po dobëson ekonominë, po ndan shoqërinë dhe po shkatërron reputacionin e vendit tonë", tha ai.
