ShBA-ja konfirmoi se Izraeli dhe Libani kanë rënë dakord për një zgjatje të afatit për tërheqjen e trupave izraelite nga Libani jugor deri më 18 shkurt.
Shtëpia e Bardhë, nëpërmjet një deklarate me shkrim, njofton se "Dakordimi mes Libanit dhe Izraelit që monitorohet nga ShBA-ja do të vazhdojë të mbetet në fuqi deri më 18 shkurt 2025".
Në deklaratë gjithashtu përfshihet informacioni se midis qeverive të Libanit, Izraelit dhe ShBA-së do të nisin negociata për kthimin e të burgosurve libanezë të kapur pas 7 tetorit 2023.
Ndërkohë, ushtria izraelite nuk është tërhequr ende nga territoret e pushtuara pavarësisht marrëveshjes së armëpushimit të arritur me Libanin.
Në sulmet që kreu dje humbën jetën 22 persona ndërsa 124 të tjerë u plagosën.
Parashikohej që ushtria izraelite të tërhiqej nga Libani deri më 26 janar
Marrëveshja e armëpushimit ndërmjet Libanit dhe Izraelit hyri në fuqi më 27 nëntor 2024 në orën 04:00 me kohën lokale.
Sipas marrëveshjes, parashikohej që ushtria libaneze do të vendosej gradualisht në zonat e pushtuara nga Izraeli në jug të vendit brenda 60 ditëve (deri më 26 janar) dhe ushtria izraelite duhej të tërhiqej.
Në periudhën pas hyrjes në fuqi të marrëveshjes, ushtria izraelite vazhdoi të shkelte armëpushimin përmes veprimeve të tilla si bombardime dhe prishjet e shtëpive.
Ushtria izraelite në një deklaratë më 24 janar njoftoi se nuk do të ishte në gjendje të përfundonte një tërheqje të plotë të dielën, duke mbrojtur idenë se procesi i tërheqjes nga jugu i Libanit ishte më shumë se 60 ditë dhe se kjo situatë ishte përfshirë në marrëveshje.
