Sekretari amerikan i Mbrojtjes përsëriti të enjten thirrjen për një rritje deri në 5 për qind të shpenzimeve të NATO-s.
Në një konferencë të përbashkët shtypi me shefin e NATO-s Mark Rutte në Bruksel, Pete Hegseth kujtoi thirrjen e Presidentit të ShBA-së Donald Trump dhe tha: "Presidenti ka thënë se 2 për qind nuk është e mjaftueshme dhe ne do të argumentojmë se deri në 5 për qind është investimi i nevojshëm nga vendet e NATO-s për të siguruar që ne jemi në gjendje të përballojmë kërcënimet e së ardhmes".
Në një deklaratë të mëparshme të mërkurën, Hegseth bëri thirrje për rritjen e shpenzimeve të mbrojtjes dhe tha se objektivi i mëparshëm prej 2 për qind të PBB-së vjetore nuk është i mjaftueshëm dhe se Trump ka bërë thirrje për 5 për qind.
Hegseth theksoi gjithashtu nevojën për ta forcuar bazën industriale të mbrojtjes për Evropën dhe ShBA-së.
"Ne kemi nevojë për aftësinë për t'i krijuar sistemet dhe municionet e nevojshme për të mbajtur një luftë," shtoi ai.
Hegseth gjithashtu përshëndeti bisedat e Trumpit të mërkurën vonë me presidentët ukrainas dhe rus, Volodymyr Zelenskyy dhe Vladimir Putin, për përfundimin e luftës në Ukrainë.
"Ka një njeri në botë i aftë të mbledhë palët së bashku për të sjellë paqen, dhe ai është Presidenti Donald Trump", tha Hegseth.
Rutte, nga ana e tij, mbështeti vërejtjet e Hegseth, duke thënë: "Ne duhet të rrisim shpenzimet e mbrojtjes sepse e dimë se nuk mund ta mbrojmë veten katër ose pesë vjet nga tani nëse nuk e bëjmë këtë."
Ai tha gjithashtu se të gjithë aleatët ranë dakord se duhet të ketë paqe në Ukrainë, se ajo duhet të jetë e qëndrueshme dhe se Ukraina duhet të jetë "në një pozicion fuqie".
Zelenskyy tha të mërkurën se kishte një "bisedë kuptimplotë" me Trump dhe "foli për mundësitë për të arritur paqen".
Trump foli gjithashtu me Putinin, i cili mbështeti pikëpamjen e tij se ka ardhur koha që ata të "punojnë së bashku".
