Sri Lanka shpall gjendje të jashtëzakonshme

Kryeministri i Sri Lankës, Ranil Wickremesinghe, i cili është emëruar edhe si president i përkohshëm i shtetit, shpalli gjendje të jashtëzakonshme në vazhdën e trazirave në vend.
Mediat e rajonit njoftuan se gazeta zyrtare në vend u botua në orët e vona të natës, ku thuhet se Wickremesinghe shpall gjendjen e jashtëzakonshme në të gjithë vendin që nga mëngjesi i sotëm si masë paraprake.
Po ashtu thuhet se ky vendim është marrë për të ruajtur sigurinë publike, rendin publik dhe materialet dhe shërbimet e nevojshme për jetën e komunitetit.
Situata në Sri Lankë
Banorët e Sri Lankës i shtuan protestat e tyre kundër situatës financiare të vendit dhe mungesës së karburantit në fund të marsit.
Pas dhunës u shpall një shtetrrethim mbarëkombëtar dhe qeveria urdhëroi të hapej zjarr mbi këdo që dëmtonte pronën publike ose të tjerët gjatë protestave.
Më 9 korrik, protestuesit hynë në rezidencën e kryeministrit dhe i vunë flakën ndërtesës.
Presidenti Gotabaya Rajapaksa, me gruan dhe dy truprojat, shkuan në Maldive më 13 korrik dhe në Singapor të nesërmen.
Wickremesinghe u emërua president i përkohshëm pasi Rajapaksa u largua nga vendi.
Rajapaksa dërgoi letrën e tij të dorëheqjes përmes postës elektronike më 14 korrik.
Në protestat e përhapura në të gjithë vendin kanë humbur jetën nëntë persona, duke përfshirë një deputet të partisë në pushtet dhe dy policë, kurse të paktën 250 të tjerë janë plagosur.