Në vitin 2023 kishte më shumë konflikte të armatosura në mbarë botën sesa në çdo vit tjetër që nga përfundimi i Luftës së Dytë Botërore, sipas një studimi norvegjez të botuar së fundmi.
Vitin e kaluar ka pasur 59 konflikte, 28 prej tyre në Afrikë, sipas Institutit të Kërkimeve të Paqes në Oslo (PRIO). Por, numri i vendeve që përjetojnë konflikt ra nga 39 në 2022 në 34.
Numri i njerëzve të vrarë në luftime është përgjysmuar në rreth 122.000 gjatë vitit të kaluar, sipas të dhënave të përpiluara nga Universiteti Suedez i Uppsalas nga organizata joqeveritare dhe ndërkombëtare. Kjo shifër, megjithatë, mbeti e treta më e larta që nga viti 1989, në sfondin e luftës në Ukrainë dhe konfliktit midis Izraelit dhe lëvizjes palestineze Hamas.
"Dhuna botërore është në nivelin e saj më të lartë që nga fundi i Luftës së Ftohtë", tha Siri Aas Rustad, një studiues i PRIO dhe autori kryesor i raportit që mbulon tendencat gjatë periudhës 1946-2023.
"Shifrat sugjerojnë se peizazhi i konfliktit po bëhet më kompleks, me aktorë më konfliktualë", shpjegoi ajo.
Ndërsa numri i vdekjeve në luftime u ul vitin e kaluar, numri i akumuluar gjatë tri viteve të fundit është më i larti për një periudhë trevjeçare në 30 vjet.
Gjithsej 28 konflikte të armatosura janë regjistruar në Afrikë, e ndjekur nga Azia me 17, Lindja e Mesme me 10, Evropa me tre dhe Amerika me një.
