Presidenti i ShBA-së, Donald Trump, kritikoi ashpër Bashkimin Evropian të mërkurën dhe premtoi vendosjen e tarifave prej 25% për eksportet e bllokut me 27 anëtarë “shumë shpejt”.
Sipas Trumpit, BE-ja “u krijua për t'i shfrytëzuar Shtetet e Bashkuara. Ky është qëllimi i saj dhe e ka realizuar me sukses. Por, tani unë jam president.”
“Ata na kanë shfrytëzuar në një mënyrë tjetër,” tha Trump para gazetarëve gjatë mbledhjes së tij të parë të kabinetit që nga marrja e detyrës në janar. “Ata nuk pranojnë makinat tona. Ata nuk pranojnë, në thelb, produktet tona bujqësore. Ata përdorin lloj-lloj arsyesh për të mos i pranuar, ndërsa ne pranojmë gjithçka nga ata. Kemi një deficit tregtar prej rreth 300 miliardë dollarësh me Bashkimin Evropian. Tani, unë i dua vendet e Evropës. Mendoj se, në një moment të largët, jam prej andej, ndoshta jo aq indirekt, por ndoshta edhe drejtpërdrejt,” shtoi ai.
Trump tha se tarifat e reja të importit do të vendosen mbi “makinat dhe shumë produkte të tjera”.
Tensionet tregtare me BE-në
Këto komente vijnë pas takimit të Trump me presidentin francez Emmanuel Macron në Shtëpinë e Bardhë të hënën dhe përpara vizitës së planifikuar të kryeministrit britanik Keir Starmer të enjten.
BE-ja është partneri i tretë më i madh tregtar i SHBA-së.
Eksportet amerikane drejt 27 vendeve anëtare të BE-së arritën në 350,8 miliardë dollarë, ndërsa importet ishin 553,3 miliardë dollarë në vitin 2022, sipas të dhënave më të fundit të Përfaqësuesit të Tregtisë së ShBA-së. Kjo krijon një deficit tregtar rreth 200 miliardë dollarë. Megjithatë, ky bilanc nuk përfshin tregtinë e shërbimeve, ku ShBA-ja ka një avantazh prej 70 miliardë dollarësh.
Gjithashtu, më shumë investime të huaja direkte vijnë nga Evropa në ShBA sesa anasjelltas, me një diferencë prej 210 miliardë dollarësh, sipas të dhënave të Komisionit Evropian.
Urdhri ekzekutiv për tarifa reciproke
Presidenti amerikan nënshkroi më 13 shkurt një urdhër ekzekutiv që detyron vendosjen e “tarifave reciproke” ndaj vendeve të huaja, për t’u barazuar me taksat e importit të vendosura nga ato. Këto tarifa do të jenë përveç atyre që Trump po zbaton tashmë ndaj vendeve të ndryshme në botë.
Trump ka vënë në shënjestër taksat mbi vlerën e shtuar (TVSh) që zbatohen mbi eksportet amerikane, si dhe taksat e konsumit të vendosura nga Britania e Madhe dhe BE-ja, si pjesë e fushatës së tij për tarifat globale.
