Zyrtarët izraelitë janë pesimistë për një marrëveshje të mundshme armëpushimi me Hamasin në Gaza, raportuan mediat lokale të enjten.
Transmetuesi publik izraelit KAN, duke cituar zyrtarë izraelitë, raportoi se Hamasi pritet të kërkojë ndryshime në planin e propozuar të armëpushimit dhe shkëmbimit të të burgosurve me Izraelin.
"Kjo do ta bëjë të vështirë arritjen e një përparimi në negociata", raportoi KAN.
Të mërkurën, tre djemtë dhe katër nipërit e liderit politik të Hamasit, Ismail Hanijeh u vranë në një sulm ajror izraelit në kampin e refugjatëve Al-Shati pranë qytetit të Gazës.
Sulmi erdhi pasi Hamasi studioi përgjigjen e Izraelit ndaj një marrëveshjeje të propozuar për armëpushim në Gaza pas një raundi të ri bisedimesh indirekte midis dy palëve në Egjipt.
Të paktën 33.545 palestinezë u vranë në sulmet e nisura nga Izraeli më 7 tetor në Rripin e Gazës pas një sulmi të Hamasit.
Izraeli ka vendosur gjithashtu një bllokadë në Rripin e Gazës, duke e lënë popullatën, veçanërisht banorët e Gazës veriore, në prag të urisë.
Izraeli është akuzuar për gjenocid para Gjykatës Ndërkombëtare të Drejtësisë (ICJ), e cila lëshoi një vendim të përkohshëm në janar duke urdhëruar Tel Aviv të ndalojë aktet e tij gjenocidale dhe të marrë masa për të siguruar që ndihma humanitare të ofrohet për civilët në Gaza.
