Fundjava pa kufi Kosovë-Shqipëri, e rritë numrin e turistëve

Fundjava e dytë e lëvizjes pa kontrolle në kufirin mes Shqipërisë dhe Kosovës, ka rritur ndjeshëm fluksin e lëvizjes së qytetarëve mes dy vendeve. Nëse deri dje fluksi i lartë i lëvizjes kuptohej nga radha e gjatë e automjeteve në kufi, për shkak të kontrollit të dokumentacionit, tashmë shifrat e kalimit kuptohen nga autoritetet, pasi në kufi nuk ka makina në radhë.
Këtë fundjavë në pikën e kalimit kufitar në Morinë, shënohet një fluks i lartë i qytetarëve të Kosovës dhe mjeteve që kanë hyrë në Shqipëri, për pushime në bregdetin shqiptar, teksa lëvizja pa kontrolle në kufi po zbatohet duke shmangur pritjet dhe radhët e gjata.
Nga kufiri Kosovë-Shqipëri Ambasadori i Shqipërisë në Kosovë Qemal Minxhozi, e ka cilësuar si lajm të mirë që po gjen zbatim liberalizimi i kufijve gjatë fundjavave e që sipas tij ka dhënë efektet e menjëhershme me 15 për qind më shumë të qytetarëve të Kosovës drejt Shqipërisë, sesa në përiudhën e zakonshme me kontrolle.
“Nga të dhënat që kemi, vetëm duke liberalizuar lëvizjen e qytetarëve këto dy javë ka një rritje të ndjeshme të lëvizjes së qytetarëve, veçanërisht atyre kosovarë që hyjnë në vendin tonë për pushime. Ndërsa presim që deri në shtator ky rritëm të jetë i shumëfishuar në dy anët e kufirit Shqipëri-Kosovë”, tha Minxhozi.
Ambasadori Minxhozi ndër të tjera tha se e njëjta procedurë po zbatohet edhe në Pikën Kufitare të Shishtavecit, si një tjetër korridor i rëndësishëm mes Shqipërisë e Kosovës.
Aplikimi për lëvizjen pa kontrolle në dy anët e kufirit, në fundjavë dhe festa zyrtare do të jetë në zbatim deri 30 shtator.