Tirana është nikoqire e konferencës së Shefave të Shtabit të Përgjithshëm të Iniciativës së Kartës së Adriatikut (ShBA-A5).
Ministri i Mbrojtjes i Shqipërisë, Pirro Vengu, gjatë fjalës së tij tha se, “ky takim simbolizon përkushtimin e vendeve tona për sigurinë kolektive, bashkëpunimin e mbrojtjes dhe stabilitetin rajonal”.
Duke rikujtuar se që prej vitit 2003, kur Karta e Adriatikut u ngjiz në Tiranë, ai tha se së bashku kemi ndjekur një vizion strategjik, duke kuptuar se siguria nuk njeh kufij.
“Sot, ne jo vetëm që reflektojmë mbi arritjet e deritanishme, por gjithashtu njohim sfidat e reja që kërkojnë përgjigjen tonë të përbashkët”, u shpreh ministri.
Vengu u shpreh se sot situata gjeopolitike ka ndryshuar, ndaj dhe angazhimi i ndërveprimit kërkon rritjen e kapaciteteve tona të mbrojtjes.
“Peizazhi gjeopolitik po ndryshon dhe kërcënimet konvencionale, siç po tregon agresioni brutal i Federatës Ruse në Ukrainë, por dhe ato jokonvencionale e hibride, si kibernetike, terrorizmi dhe krimi transnacional, vazhdojnë të evoluojnë. Prandaj, duke forcuar ndërveprimin tonë, ne rrisim kapacitetet tona të mbrojtjes, duke bërë që vendet tona të mund t’i përgjigjen me shpejtësi dhe efektivitet çdo kërcënimi”, theksoi Vengu.
Sipas tij, vendet tona udhëhiqen nga një qëllim i përbashkët, për të garantuar paqen dhe sigurinë për qytetarët tanë.
Ai vuri në dukje angazhimin e ministrisë së Mbrojtjes dhe Forcave të Armatosura për të qenë kryeqendra e dialogut dhe bashkëpunimit rajonal, pasi siç tha ai, “këtë vit, kryesojmë iniciativën ShBA-Karta e Adriatikut, ku organizuam në qershor takimin e Balkan ChoD-s, dhe në muajin nëntor do të mirëpresim në Tiranë ministerialin e SEDM-it”.
Më tej, ministri shqiptar nënvizoi se “fokusi ynë është promovimi i fqinjësisë së mirë, pranimit të njërit tjetrit, integrimi i plotë Euro-Atlantik dhe forcimi i bashkëpunimit dhe zhvillimit rajonal”.
Vengu tha po ashtu se “Nuk duhet të lejojmë që të biem pre e interesave dhe ndërhyrjeve dashakeqëse të Rusisë, Kinës dhe Iranit, të cilat përbëjnë një triadë mjaft shqetësuese, dhe për ne si Shqipëri ato nuk duhet të kenë vend në të tashmen dhe të nesërmen e rajonit tonë”.
Ministri deklaroi se Shqipëria do të vijojë të jetë një avokate e palëkundur e bashkëpunimit rajonal.
“Karta e Adriatikut qëndron në ballë me tregues të prekshëm, si pjesëmarrja e vendeve tona në Afganistan para shumë viteve, apo trajnime e stërvitje të përbashkëta, siç është seria e stërvitjeve “Defender Europe”, rishtazi“, vijoi ai.
Ai tha se Shqipëria po përgaditet për dislokimin e një ekipi trajnues të disa vendeve të A5 në misionin e NATO-s në Irak (nëntor 2024), në kuadër të Programit për Zhvillimin e Edukimit në Fushën e Mbrojtjes së institucioneve të sigurisë së Irakut.
“Duhet gjithashtu që Karta të qëndrojë besnike e parimeve themelore të saj, përfshirë ‘Politikën e Dyerve të Hapura’. Në këtë kuptim, më lejoni të them, që vendi i Kosovës duhet të jetë këtu, në këtë tavolinë”, bëri thirrje ministri.
Vengu deklaroi se, “NATO-ja dhe BE-ja qëndrojnë si forca të pakrahasueshme dhe shumëfishuese për të ardhmen e rajonit, ndërsa ShBA-të “ylli polar”, pa të cilin, ky rajon, nuk do ishte ky që është sot.”
Ai vlerësoi konferencën shumë të rëndësishme si një pohim i partneritetit dhe përkushtimit tonë për të qëndruar së bashku përballë vështirësive dhe siguruar një botë më të sigurt për brezat që do të vijnë.
