Agjencia Kombëtare e Pyjeve e Shqipërisë dhe Agjencia Pyjore e Kosovës nënshkruan sot në 102-vjetorin e Shërbimit Pyjor Shqiptar një memorandum bashkëpunimi, një hap i rëndësishëm për mbrojtjen e pasurisë natyrore të dy vendeve.
Memorandumi i bashkëpunimit u nënshkrua nga drejtori i Agjencisë Kombëtare të Pyjeve të Shqipërisë, Artur Kala dhe drejtori i Agjencisë Pyjore të Kosovës, Fidan Dema.
Ky bashkëpunim do ta mundësojë përmirësimin e menaxhimit të resurseve pyjore, forcimin e kapaciteteve për mbrojtjen e pyjeve dhe promovimin e zhvillimit të qëndrueshëm.
Qëllimet kryesore të këtij memorandumi janë plotësimi i detyrimeve përkatëse për aderimin e Shqipërisë dhe Kosovës në Bashkimin Evropian, shkëmbimi i eksperiencave dhe praktikave më të mira, si dhe zgjidhjeve për përballimin e sfidave në arritjen e përputhshmërisë me objektivat e qeverive respektive, si dhe masat për Ndryshimet Klimatike.
Gjithashtu, ky memorandum përfshin shtrirjen e bashkëpunimit bilateral në fushën e pyjeve, në zbatim të bashkëpunimit midis qeverisë së Republikës së Shqipërisë dhe asaj të Republikës së Kosovës.