Vihet në funksion Pika Kufitare e Lëvizshme në Shqipëri

Në brigjet shqiptare do të vendoset një postë kufitare e lëvizshme për të lehtësuar hyrjen e shtetasve të huaj që mbërrijnë në territorin tonë me mjete lundruese apo të shtetasve shqiptarë që duan të dalin në Mesdhe pa qenë nevoja të paraqiten në portet e vendit tonë.
Kryeministri Edi Rama u shpreh sot se, tashmë ka nisur funksionimi i Pikës Kufitare të Lëvizshme përgjatë bregdetit dhe nga kjo lehtësi e jashtëzakonshme përfitojnë të gjithë shtetasit e huaj dhe shqiptarë që hyjnë apo dalin nga ujërat tona me mjetet e tyre lundruese.
“Jo më o hajde ankorohu në port o nuk e shijon dot bregun e Shqipërisë me anije”, shkroi Rama në një postim në rrjetet sociale.
“Një lajm i mirë për mjetet lundruese turistike dhe ata që duan të shijojnë mrekullitë e vendit tonë nga deti. Tashmë ka nisur funksionimi i Pikës Kufitare të Lëvizshme përgjatë bregdetit. Nga kjo lehtësi e jashtëzakonshme përfitojnë të gjithë shtetasit e huaj dhe shqiptarë që hyjnë apo dalin nga ujërat tona me mjetet e tyre lundruese. Policia Kufitare mbërrin tek ata kudo në bregdet për të kryer procedurën përkatëse”, u shpreh Rama.