Fermerët në Selanik të Greqisë kanë mbajtur një protestë të enjten me traktorët e tyre, duke kërkuar mbështetje nga qeveria.
Duke dalë në rrugë me dhjetëra traktorë, protestuesit u mblodhën në qendër të qytetit.
Fermerët mbajtën fjalime të ndryshme dhe më pas ecën drejt një hoteli ku po mbahej një aktivitet me pjesëmarrjen e kryeministrit, Kyriakos Mitsotakis.
Protesta përfundoi pasi policia mori masa të forta sigurie dhe mbylli rrugët drejt hotelit.
Aksioni u mbështet edhe nga bletarët dhe blegtorët.
Shoqatat greke të fermerëve kanë protestuar prej disa javësh, duke kërkuar mbështetjen e qeverisë për çështje të ndryshme.
Në mënyrë që të ulet kostoja e prodhimit, ata kërkojnë që karburanti dizel që përdoret në bujqësi të përjashtohet nga taksat, të ulet çmimi i energjisë elektrike, të hiqet TVSh-ja nga blerjet e bëra për aktivitete bujqësore, të mbulohen të gjitha dëmet në tokat bujqësore nga fatkeqësitë natyrore dhe të rriten pensionet.
