Një ekip shkencëtarësh nga Qendra Mjekësore Universitare Göttingen në Gjermani ka zhvilluar një metodë për trajtimin e sëmundjeve të zemrës duke përdorur "inde muskulore të zemrës" të krijuara nga qeliza staminale të marra nga gjaku. Fillimisht, ky trajtim u testua te majmunët me dështim kardiak dhe më pas, në vitin 2021, u aplikua te një paciente 46-vjeçare që vuante nga dështimi i zemrës pas një ataku kardiak.
Gjatë procedurës, studiuesit vendosën dhjetë inde muskulore, të përbëra nga 400 milionë qeliza, në sipërfaqen e jashtme të zemrës së pacientes. Pas një periudhe trimujore, u konstatua se gjendja e pacientes mbeti e qëndrueshme. Ekzaminimet treguan se indet e implantuara ishin integruar me zemrën, duke formuar enë të reja dhe duke mbështetur funksionin e pompimit të saj.
Shkencëtarët theksuan se indet muskulore u qepën në sipërfaqen e zemrës përmes një prerjeje të vogël në gjoks. Ky trajtim synon të ndihmojë pacientët që janë në pritje të transplantit të zemrës, por nuk synon të zëvendësojë plotësisht nevojën për transplantim.
Pas këtij suksesi fillestar, ekipi aplikoi të njëjtën metodë te 14 pacientë të tjerë dhe planifikon të zgjerojë përdorimin e kësaj metode për të trajtuar më shumë pacientë në të ardhmen. Rezultatet e këtij hulumtimi u publikuan në revistën "Nature".
Sipas Organizatës Botërore të Shëndetësisë, sëmundjet e zemrës janë një nga shkaqet kryesore të vdekjeve në mbarë botën, si dhe diagnostikimi i hershëm është thelbësor për trajtimin efektiv. Ndërsa përpjekjet e mëparshme për të implantuar qeliza staminale ose inde muskulore në zemër janë përballur me sfida si ritmi i parregullt kardiak, formimi i tumoreve dhe refuzimi nga sistemi imunitar, ky studim i ri ofron shpresë për një qasje më të sigurt dhe efektive në trajtimin e sëmundjeve kardiake
