Gjithnjë e më pak balena gri në bregun perëndimor të Amerikës së Veriut

Numri i balenave në vitin 2016 ishte 27.000, ndërsa këtë vit janë numëruar 16.650. Rënia e popullsisë së balenave në Paqësor prej 38 për qind është e ngjashme me luhatjet e regjistruara më parë, por kërkon vëzhgim më të afërt, tha në një raport Administrata Kombëtare e Oqeanit dhe Atmosferës së SHBA (NOAA).
“Duke pasur parasysh rënien e vazhdueshme të numrave që nga viti 2016, ne duhet të vëzhgojmë nga afër popullsinë për të kuptuar se çfarë e shtyn këtë prirje”, tha David Weller, menaxher i Divizionit të Gjitarëve dhe Breshkave të NOAA-së.
Studiuesit e NOAA-së thanë se rënia e fundit ka të ngjarë të shkaktohet, ndër të tjerash, nga shqetësimet mjedisore që kanë zhvendosur burimin e ushqimit të balenave te krustacet e vegjël dhe jovertebrorët e tjerë që ata i gjuajnë në Arktik.
Për shkak të një rritjeje të pazakontë të bllokimit të balenave gri në Bregun Perëndimor të ShBA-së, nga Meksika në Alaskë, NOAA-ja zbuloi se afërsisht 600 balena të gjetura të ngordhura në plazhe që nga viti 2019 ishin të kequshqyera, por disa vdiqën gjithashtu nga përplasjet e anijeve ose sulmet e balenave vrasëse.
Rënia e përgjithshme e popullsisë përkon me riprodhimin e reduktuar, zbuluan studiuesit. Në numërimin e fundit të këtij maji, kishte rreth 217 të vegjël, nga 383 të regjistruara vitin e kaluar dhe më të paktat që nga fillimi i numërimit në vitin 1994, tha NOAA-ja.
Balenat gri janë një nga kafshët më të mëdha në tokë, peshojnë deri në 41 tonë dhe janë deri në 15 metra të gjata. Ata migrojnë afërsisht 16.000 kilometra në vit midis Arktikut, ku ushqehen, dhe bregdetit meksikan, ku shumohen.
Gjuetia komerciale e balenave në një moment pothuajse i solli balenat gri në prag të zhdukjes, por ato kanë rindërtuar popullsinë e tyre dhe u hoqën nga lista e specieve të rrezikuara në vitin 1994.