Në këtë ditë, 40 vjet më parë, në kryeqytetin e Bosnjë e Hercegovinës, Sarajevë, u hapën Lojërat e 14-ta Olimpike Dimërore.
Nga 8 deri më 14 shkurt 1984, Sarajeva ishte qendra e botës dhe e gjithë ish-Jugosllavia mori pjesë në organizimin e Olimpiadës.
Në ndërtimin e objekteve u përfshinë kompani nga Bosnjë e Hercegovina, si dhe e gjithë Jugosllavia. Në të njëjtën kohë, secila nga RTV-të nga republikat e ish-Jugosllavisë, nga Lubjana deri në Shkup, kishte një arenë të cilën e mbulonin.
Në atë kohë Sarajeva përjetoi zhvillim në të gjitha sferat dhe u krijua një klimë pozitive sociale.
Ajo për të cilën do të mbahen mend Lojërat Olimpike në Sarajevë është bora që ra një natë para ceremonisë së hapjes. Nxënësit e gjimnazit të parë dhe të dytë me duart e tyre larguan borën nga karriget në stadiumin e Koshevës, në mënyrë që hapja të bëhet pa problem.
Lojërat Olimpike Dimërore të mbajtura në Sarajevë kushtuan gjithsej 141.647.000 dollarë dhe përfunduan me një tepricë prej 12.000.000 dollarësh. Ishin lojërat e para Olimpike që përfunduan me një tepricë. Të gjitha të mëparshmet ishin në borxhe dhe shumë qytete kishin vështirësi për të mbuluar kostot.
Lojërat e Sarajevës ishin, në shumë aspekte, një rekord në atë kohë. Këto ishin lojërat e para ku nuk pati bojkotime të Atlantikut të Veriut apo të Traktatit të Varshavës dhe ishin një rekord për numrin e vendeve pjesëmarrëse.
Ato u ndoqën nga rreth dy miliardë e gjysmë shikues në mbarë botën, ishin 49 ekipe kombëtare, u dhanë 222 medalje, morën pjesë 2.691 sportistë dhe trajnerë, u shitën 640 mijë bileta dhe u ndoqën nga 7.825 gazetarë nga 760 redaksi.
Vendet më të suksesshme ishin Gjermania Lindore e atëhershme (nëntë medalje ari, nëntë argjendi dhe gjashtë bronzi) dhe BRSS-ja (gjashtë medalje ari, dhjetë argjendi dhe nëntë bronzi).
