Eurodeputetja Tineke Strik tha për Anadolu Agency se Përfaqësuesi i Lartë në Bosnjë e Hercegovinë ka bërë lëvizje katastrofale duke ndryshuar rregullat zgjedhore në mënyrë retroaktive, duke thelluar ndarjen etnike në vend.     Foto: Tineke Strik/Twitter 

Duke iu dorëzuar dëshirave të Komunitetit Demokratik Kroat në Bosnjë e Hercegovinë (HDZ BiH), Zyra e Përfaqësuesit të Lartë (OHR) po plotëson kërkesat e kësaj partie, tha përfaqësuesja e Parlamentit Evropian Tineke Strik në një intervistë për Anadolu Agency (AA), duke folur për ndryshimet në Kodit Zgjedhor të BeH dhe Kushtetutën e Federatës së Bosnjë-Hercegovinës.
Më 14 tetor, Strik reagoi në rrjetet sociale lidhur me vendimin për ndryshimet Kodit Zgjedhor të BeH dhe Kushtetutën e Federatës së BeH, dhe më pas njoftoi se me një koalicion të gjerë prej mbi 25 përfaqësuesish nga BE-ja, Parlamentet gjermane, holandeze dhe franceze, ata po i bënin thirrje Zyrës së Përfaqësuesit të Lartë (OHR), përkatësisht Përfaqësuesit të Lartë në BeH, Christian Schmidt, të revokonte amendamentet e fundit në Kodin Zgjedhor.
Lëvizje katastrofale nga Schmidt
Eurodeputetja nga radhët e të gjelbërve/EFA Tineke Strik, foli detalisht për AA se pse lëvizja e Përfaqësuesit të Lartë në BeH, Christian Schmidt është e gabuar.
“Para se të shihet përmbajtësisht propozimi i Zyrës së Përfaqësuesit të Lartë, nuk mund dikush thjesht të ndryshojë rregullat zgjedhore pasi që zgjedhësit të kenë shfrytëzuar të drejtën e votës. Për të pasur zgjedhje të lira dhe korrekte, votuesit duhet ta dinë kornizën para kohe. Kjo thuhet në standardet e OSBE-së, por nuk ka nevojë të jeni ekspert për zgjedhje për ta kuptuar se është e padrejtë nëse rregullat ndryshojnë në mënyrë retroaktive”, tha Strik.
Propozimet e Schmidt e betonojnë ndarjen etnike
Strik beson se duke lëshuar pe ndaj komunitetit kroat në BeH, Zyra e Përfaqësuesit të Lartë u del krah atyre.
“Kur bëhet fjalë për përmbajtjen e ndryshimeve, Schmidt ndryshon Ligjin zgjedhor në favor të komunitetit kroat. Propozimet e tij e betonojnë ndarjen etnike në ligjin zgjedhor, ndërsa në fakt duhet të fokusohemi në Bosnjë, ku ndarjet etnike janë tejkaluar dhe ku të gjithë janë të barabartë”, theksoi Strik.
Përfaqësuesi i lartë i bashkësisë ndërkombëtare në Bosnjë e Hercegovinë, Christian Schmidt, më 2 tetor imponoi ndryshimin e Kodit Zgjedhor të Bosnjë e Hercegovinës dhe Kushtetutën e këtij vendi, vetëm një orë pas përfundimit të zgjedhjeve të përgjithshme.

AA