Kryeministri i Shqipërisë, Edi Rama, ka zhvilluar një vizitë në mauzoleun Anıtkabir të themeluesit të Republikës së Türkiyes, Mustafa Kemal Atatürk, në Ankara. Rama i cili ndodhet në një vizitë zyrtare në Türkiye, së bashku me delegacionin që kryeson kanë vizituar mauzoleun Anıtkabir.
Kryeministri shqiptar ka vendosur kurore lulesh në mauzole.
Pas fotografimit këtu, ai ka nënshkruar në Librin special të Anıtkabirit. "Kujtojmë liderin e madh në emrin e të cilit gjejmë rrënjët e shtetit modern turk dhe trashëgimia e të cilit ngjyros identitetin e shoqërisë turke. Prania e qëndrueshme e Mustafa Kemal Atatürkut tregon një nivel gjithëpërfshirës, paqeje dhe përparimi që është vështirë të arrihet edhe sot", ka shkruar Rama.
"Këtu, në vendin e shenjtë të prehjes së përjetshme të Atatürkut, ne kremtojmë vizionin e tij për një Türkiye moderne, të arritur përmes mënyrave të papritura të dashurisë dhe paqes", shtoi ai.
Kryeministri Rama po zhvillon një vizitë zyrtare në Türkiye, me ftesë të presidentit Recep Tayyip Erdoğan.
Pjesë e delegacionit të kryesuar nga Kryeministri Rama janë edhe zv.kryeministrja dhe ministrja e Infrastrukturës dhe Energjisë, Belinda Balluku; ministri për Evropën dhe Punët e Jashtme, Igli Hasani; ministri i Mbrojtjes, Niko Peleshi; ministrja e Bujqësisë dhe Zhvillimit Rural, Anila Denaj; ministrja e Shëndetësisë dhe Mbrojtjes Sociale, Albana Koçiu; ministrja e Arsimit dhe e Sportit, Ogerta Manastirliu dhe ministrja e Turizmit dhe e Mjedisit, Mirela Kumbaro.
