Kryeministri i Kosovës Albin Kurti ka kërkuar nga bashkësia ndërkombëtare të sanksionojnë dhe të dënojnë Serbinë për agresion ndaj Kosovës më 24 shtator.
Në fjalimin para deputetëve të Kosovës ai tha se nëse kalon Serbia e pandëshkuar ajo mund të përsërisë krimin.
“Për këtë akt të agresionit ndaj Kosovës, Serbia duhet të sanksionohet dhe të ndëshkohet ndërkombëtarisht. Nëse kalon e pandëshkuar ajo atëherë do të përsërisë krimin. Armatimi ushtarak dhe trajnimet luftarake që i kishin profesionistët serbë të cilët sulmuan në Banjskë të dielën janë që të gjitha nga Serbia dhe të freskëta në kohë”, tha Kurti.
Përkitazi me këtë, ai tha se grupet kriminale dhe terroriste në Banjskë të Zveçanit e panë se nuk kanë asnjë mundësi me Policinë e Kosovës.
Ai kërkoi nga shtetet partnere të Kosovës t’i shpallin terroriste organizatat që veprojnë në veri “Mbrojta Civile” dhe “Brigada e Veriut”. “Me të zbardhur drita u pa se çfarëdo grupesh kriminale dhe terroriste nuk kanë asnjë mundësi me Policinë e Kosovës. Ata u vranë, u arrestuan ose po ndiqen sepse janë në ikje. Të dielën në Banjskë të Zveçanit kishte sulm terrorist dhe kriminal i cili cenoi integritetin territorial, sovranitetin shtetëror dhe sigurinë tonë kombëtare. Sulmuesit të cilët arritën të ikin duhet të ekstradohen, duhet të dorëzohen në organet e Kosovës. Organizatat ‘Mbrojtja Civile’ dhe ‘Brigada Veriore’ duhet të shpallen organizata terroriste edhe nga shtetet tona mike, partnere dhe aleate ashtu siç bëri qeveria e Kosovës”, theksoi Kurti.
Situata në Banjskë dhe në veri të Kosovës në përgjithësi është stabile dhe e qetë. Katër ditë pas konfliktit, ku humbi jetën një polic i Kosovës, qarkullimi në hyrje dhe dalje të fshatit zhvillohet lirshëm, ndërsa Policia e Kosovës është e vendosur në terren. Shihni kronologjinë e konfliktit në Banjskë.
