Në kalatën e portit të Durrësit dy tragete u përplasën të hënën në mesditë, si pasojë e një manovre të gabuar, për shkak të motit të rrëmbyeshëm.
Njëri nga tragetet ka qenë me pasagjerë kur ka ndodhur përplasja, që ka shkaktuar vetëm disa dëme materiale, por jo të plagosur, sipas medieve.
Me ndihmën e rimorkiatorëve, tragetet u ankoruan në kalatë.
Më herët, Autoriteti Portual Durrës, njoftoi për kushtet e përkeqësuara hidrometeorologjike në Shqipëri gjatë ditës së sotme.
Drejtoria e Përgjithshme Detare e Shqipërisë njoftoi se si pasojë e kushteve të përkeqësuara të motit ka pasur vonesa në mbërritje dhe proceset e bregëzimit të trageteve në portin e Durrësit.
Sipas DPD-së, kompanitë e lundrimeve bëjnë të ditur se si pasojë e kushteve të paqendrueshme të motit trageti “AF Marina” i parashikuar për lundrim mesditën e sotme nga Porti i Durrësit drejt Barit, (Itali) ka pezulluar nisjen deri në normalizimin e situatës.
Ndërsa trageti “AF Franceska” do të kryejë lundrim pa pasagjerë si pasojë e kushteve të përkeqësuara meteorologjike.
Ndërkaq, sipas Autoritetit Portual Durrës bëhet e ditur se në terminalin e kontejnerëve proceset operacionale vijojnë normalisht dhe pa ndërpreje.
