Në Shqipëri është organizuar një protestë antiqeveritare me moton “Në mbështetje të luftës kundër korrupsionit”.
Qindra qytetarë janë mbledhur para selisë së Kryeministrisë së Shqipërisë në Bulevardin "Dëshmorët e Kombit" në Tiranë, në kuadër të reagimeve dhe protestave të organizuara pas arrestimit të kryetarit të Bashkisë së Tiranës, Erion Veliaj.
Pjesëmarrësit në protestë ndër të tjera mbanin në duar pankartat me mbishkrimet "Të korruptuarit në burg", "Qeveri e korruptuar, drejtësi e kërcënuar" dhe "Pa drejtësi nuk ka BE".
Gjatë fjalimeve në protestë u theksua se me arrestimin e kryebashkiakut Veliaj drejtësia ka filluar të funksionojë dhe se qytetarët "duhet të rreshtohen në anën e drejtësisë".
Gjithashtu është theksuar se me protestën synohet të ofrohet "mbështetje për luftën kundër korrupsionit në Shqipëri".
Protesta është organizuar në kuadër të protestave dhe reagimeve ndaj arrestimit të Veliajt organizuar në ditët e fundit nga parti politike opozitare, aktivistë dhe deputetë opozitarë.
Në Shqipëri janë organizuar për muaj me radhë protesta për të “denoncuar rastet e korrupsionit në Bashkinë e Tiranës” dhe me kërkesën për dorëheqjen e kryebashkiakut Veliaj.
Arrestimi i kryebashkiakut Veliaj
Kryetari i Bashkisë së Tiranës, Erion Veliaj, është arrestuar më 10 shkurt, i dyshuar sipas autoriteteve për korrupsion dhe pastrim parash dhe aktualisht ndodhet në paraburgim.
Ndërkohë, ndaj bashkëshortes së Veliajt, Ajola Xoxa, është vendosur masa “ndalim i daljes jashtë shtetit” dhe “detyrim për t’u paraqitur në policinë gjyqësore”, e dyshuar për disa vepra penale.
Veliaj është kryetar i Bashkisë së Tiranës që prej vitit 2015, ndërkohë ka mbajtur post edhe në Qeverinë e Shqipërisë, si dhe ka qenë edhe deputet.
