Këshilli i Ministrave në Shqipëri ka miratuar projektligjin për Krijimin e Forcës Rezerviste.
Ministri i Mbrojtjes i Shqipërisë, Pirro Vengu, përmes një postimi në rrjetet sociale, e ka cilësuar këtë vendim si një lajm të mirë për fuqizimin e kapaciteteve njerëzore në Forcat e Armatosura.
“Ky ligj u jep mundësinë ish-ushtarakëve që kanë vendosur për arsye të ndryshme të zhvillojnë karrierën e tyre në privat të rikthehen në detyra aktive në Forcat e Armatosura për misione specifike apo angazhime periodike", shkruan Vengu.
Forca rezerviste siç shkruan Vengu është gjithashtu një instrument i dobishëm që gërsheton fleksibilitetin e karrierës së atyre që kanë punuar gjithnjë në sektorët civilë (privat apo shtetëror), me mundësinë e kontributit aktiv, çka e kërkojnë me vendosmëri gjithnjë e më shumë profesionistë të rinj.
"Këta individë të trajnuar do të kontribuojnë në ruajtjen e gatishmërisë dhe operacionalitetit të FA-së, si dhe përmbushjen e detyrimeve të Shqipërisë në kuadër të NATO-s dhe operacioneve për paqe e siguri, apo emergjencave civile brenda dhe jashtë kufijve”, sqaron Vengu në profilin e tij zyrtar në Facebook.
Sipas Ministrit të Mbrojtjes, ky plan, i mbështetur dhe nga një buxhet i dedikuar për të cilin do të kërkohet miratimi në Kuvend, synon që numri i rezervistëve të arrijë në 20% të trupave aktive, ose rreth 2.100 trupa deri në vitin 2030, duke përforcuar kapacitetet mbrojtëse në çdo situatë që kërkon reagim të shpejtë dhe efektiv.
